Video: Rappertartoq Jens Kleist aalisartuuvoq ukioq manna nersornaaserneqarluni

- Qatserparput, hahahaha, kammalaatikkalu ataatsimoorluta unnuk taanna unnuk ingerlapparput.

21-nik ukiulik, Jens Kleist Aasianneersoq nuannaartuuvoq. Taannami Kodap nipilersortartunut taalliortunullu Nuummi nersorsaasiinerani arfininngormat nersornaaserneqarpoq.

Nipilersortartunut 2019-imi 2020-milu saqqummersitsisunut nersornaasiisoqarpoq. Kode Awardsip corona pissutigalugu siorna aaqqissuunneqannginneranik tamanna pissuteqarpoq.

Jens Kleist Aasianni inunngorlunilu peroriartorpoq. Taanna ulluinnarni aalisartuuvoq, taassumali nipilersorneq arfineq-pingasuinnarnilli ukioqarluni soqutigisarilerpaa.

-Rapperneq aallartippara qeqarama immiussissutitaarama, ataatanniit Mac-itaarama, taava ooriutikka atorlugit mikrofooni mixereerannguarlu pisiarikakkit, taava mac-imeereersoq atorlugu immiusseqaarpunga, taava tassanngaaniit nipilersuusiortalerpunga, rappertartoq oqarpoq.

AAMMA ATUARUK Erinniortunut taalliortunullu nersornaasiuttakkat arfininngorpat tunniunneqassasut

- Qiimaalannartorujussuuvoq, taavalu piumassusineqqinnarluni nutaaliornissamut isumasarsiaqarneruleqqinnarlunilu.

Jens Kleistip saqqummersitani Qaammatigissup Unnuaani ilaatigut saqqummersitaraa.

Taassuma saqqummersitai Itunesikkut pisiarineqarsinnaapput.

Nersornaaserneqartut allat tassaaapput: 

Ukioq 2019-imut nersornaaserneqartoq: Erinarsortartoq guitarertartorlu Gerth Lyberth.

Ukioq 2020-imi nersorsaaserneqartut: ÎVA (Gustav Lynge Petrussen, Josef Tarrak Petrussen). Taakku R&B-mik, rappimik, elctronicamillu ataatsimoortitsisartutut ilisimaneqarput, tassanilu oqaatsit ilitsoqqussat tassa kalaallisut kisimik atorlugit erinarsortarlutik.

Angut Clasen ataqqinaammik nersorsaaneqarpoq.

Nersornaaserneqartut tamarmik 25.000 koruuninnapput.