Video: Oqallinnerpassuit kigarneqartarput
Angut inuusuttoq mac-imi saanut ingippoq internetimilu oqalliffiit ilaannut oqaaseqarluni. Sorianngitsoq oqallinneq sangoriasaarpoq allaat sakkortuumik ingerlanneqalerluni.
Tassa video-mi 'Oqallinnerit - Debates'-imit ippassaq youtube-mut ikkunneqartumit tigulaagaq. Taanna isiginnaartunut siullerpaamik takutinneqarpoq Future Greenland pillugu aaqqissuussisoqarmat videomillu suliarinnittuupput angutit inuusuttut sisamat.
- Internetimi naapittarfiit Kalaallit Nunaanni sakkortoorujussuarmik sunniuteqarput siammarsimasorujussuulluta najugaqaratta. Kisianni aamma uggornartarpoq Sermitsiaq.ag-mi aamma KNR-mi oqallinnerit sangusoortarnerat, suleqatigiit sinnerlugit Ivik Jensen oqarpoq.
Taakku videoliaat taamaallaat 1 minut 47 sekundinik sivisussuseqarpoq. Taamaattoq paasinarluartumik takutinneqarpoq inuit marluk oqallinnerat qanoq allanngortinneqalertorsinnaatiginersoq allaat oqallinnermik aallarniisut peqataarpiarunnaarsinneqarlutik.
- Oqallittarfinni quiasaarniaraanni tamanna eqqarsaatigilluaqqaagassaavoq imaassinnaannammi allat pimoorussilluni oqallinnissaq piumanerugaat. Taama pisoqaraangat oqallinneq sangutinneqartarpoq. Ukiormanna arlaleriarluni qinersisoqartussaammat pissuserissaartumik oqallinnissaq pingaaruteqartorujuuvoq. Tassami isornartorsiuisoqarsinnaavoq inoqatinik asissuinngikkaluarluni, Ivik Jensen oqarpoq.
Suleqatigiit tassaapput Ivik Jensen, Laarseeraq Chemnitz Egede, Jens Andersen aamma Pierre Minik Lynge. Taakku suleqatigiilerput siorna CreationCamp Changeagents.gl-mit aaqqissuunneqartoq ingerlanneqareersoq.
Video piviusunngorpoq nammineq piumassutsimik peqataasut ikiortigalugit.
- Oqaasertaqanngitsumik sanasimavarput taamaammat nunami sumiluunniit takutinneqarsinnaavoq. Taama aalajangerpugut siunertami saniatigut allatut oqallisaannginnissaa anguniarlugu, Ivik Jensen oqarpoq.
Aajuna video 'Oqallinnerit - Debates'.
