Video: Nive Angulu akioriittut
Erinarsortartoq Nive Nielsen nunarpassuarni angalasarpoq nipilersoqatini Nive Nielsen & The Deer Children assigiinngitsunut nipilersoriaraangata. Takutissinnaasaminnilli video-mik amigaateqartarsimapput nipilersoriaatsimik oqaluttuarinerani takutissinnaasaminnik.
Tamanna Tumit Productionip qanoq iliuuseqarfigaa maanna erinarsuut 'Good for you' video-nngorlugu, tassanilu Nive Nielsen aamma Angu Motzfeldt akioriillutik erinarsorput. Videop suliarinerani Nive Nielsen aamma ilusilersueqataavoq.
- Immiunnera unnuup ataatsip ingerlanerinnaani pivoq katiternerali piffissaq sivisunerusoq atorlugu suliaraarput, Aka Hansen Tumit Production-imiit KNR.gl-mut oqarpoq.
Videop eqqumiitsumik ilaqarnissaa Nive Nielsenip toqqarsimavaa immiunneralu Nuup nunataani qaarsorasaartumi assilisaavoq.
Erinarsuummik suliaqaqataasoq Angu Motzfeldt videomi peqataavoq.
Nive Nielsen nunarpassuarnut angalaleraangat video nassatarineqartassaaq erinarsuut 'Good for you' nuannarineqarluartarmat.