VIDEO: Naak coronavirusi killilersuigaluartoq Kulunnguaq Run ingerlanneqarpoq
Arpatitsinermi isorartussutsinut 2,4,8,12 aamma 24 kilometerinut arpaqataajumallutik nalunaartut 72-iupput. Sialleraluartoq tamanna arpattartunit uniffigineqanngilaq.
- Pissanganarpoq, siallerami iluarunartorujussuuvoq. Nillataarluni imatut kiarujunnani, taama oqarpoq Rina Kristiansen 24 kilometerisut isorartitsigisumut arpaqataaniaraluartoq, sungiusarpallaarsimannginnini pissutigalugu 12 kilometereqataasoq.
Kulunnguaq Run juulip qaammataani arfininngornermi kingullermi ingerlanneqartarpoq. Ukioq kingulleq 250-t missaaniittut peqataapput, taakkunani meeqqat inuusuttuaqqallu amerlanerpaajullutik, kiisalu takornariat arlaqartut aamma peqataasimallutik. Ukioq mannali pissutsit allaannerupput.
- Iluliarmiut mattussaariasaaramik arpaqataasinnaanatik tassunga aaqqissuussamut. Mamaagineqarpoq aamma sinerissatsinniit aamma nunaniillu allannit ilaasoqartalereeraluarami. Taanna malunnarpoq, aaqqissueqataasoq Laila Mikaelsen oqarpoq.
Video: KNR
