VIDEO Meeqqat angerlarsimaffiup avataanut inissinneqartut isumaqatigiinngissutigigaat

- Piumasaqaatigaarput inatsisit avaqqullugit meeqqanut sullissineq unitsinneqassasoq, taamaammat naalakkersuinikkut akisussaasuusoq pingajussaanik isumasioqatiseriniarlugu aalajangerpugut.
 
- Ilumoorsinnaanngilaq meeqqat angerlarsimaffiup avataanut inissinneqarsimasut 40 %-ii tikillugit pilersaarusiuunneqarsimanngitsut, tamanna aaqqiivigineqarniarli. Ilaqutariittut inuunermut meeqqanullu pineqartunut pingaaruteqarpoq, IA sinnerlugu Inatsisartunut ilaasortaq Juliane Henningsen oqarpoq.

Kommuneqarfik Sermersuumut tunngatillugu ajornerpaamik inissisimasoqarpoq, tassanimi meeqqat angerlarsimaffiup avataanut inissinneqarsimasut affaat iliuusissat pillugit pilersaarusiortoqarsimanngilaq. Qaasuitsup Kommuniani angerlarsimaffiup avataanut inissinneqarsimasut sisamararterutaat pineqarput Qeqqata Kommunianilu angerlarsimaffiup avataanut inissinneqarsimasut 10 procentii pineqarlutik.

Siunissaq qularnaarneqassaaq
Meeqqat inuusuttullu katillugit 240-t siunissartik pillugu iliuusissat pillugit pilersaarusiuunneqarsimanngillat.
 
- Tamanna soorunami akuerineqarsinnaanngilaq. Meeqqap inuusuttulluunniit angerlarsimaffiup avataanut inissnneqarsimasup qanoq siunissaqarnerluni ilisimatinneqarnissaa soorunami pingaarpoq, Juliane Henningsen KNR-imut oqarpoq.

AAMMA ATUARUK Meeqqat ikiortariaqartut sumiginnarpagut

Meeqqat angerlarsimaffiup avataanut inissinneqarsimasut tamarluinnaasa septembarip aallaqqaataani iliuusissat pillugit pilersaarusiorfigineqareersimanissaat Inatsisartuni siornatigut aalajangiiffigineqareerpoq, tamannali suli iluatsinneqarsimanngilaq.

 - Meeqqanik angajoqqaaminnit isumagineqarsinnaanngitsunik naalakkersuisuisut sullissinerat ajuusaarnarpoq.
 
- Naalakkersuisut isumasioqatiseraagut oqarluta suliassaqarfimmi iliuuseqartoqartariaqartoq. Maannamut suliniutaasimasut naammaginngilagut, Juliane Henningsen oqarpoq.
 
IA aamma akisussaaffeqarpoq
Naalakkersuisoq Martha Lund Olsen sisamanngormat unnukkut Qanoruumi apersorneqarluni oqaatigaa, meeqqat angerlarsimaffiup avataanut inissinneqarsimasunut tunngatillugu akisussaaffik naalakkersuisuusimasut IA-mit peqataaffigineqartut aamma akisussaaqataaffigigaat.
 
- Suliaq Naalakkersuisut siuliinit aallartinneqarsimasuuppat ullumikkut pissutsit taama ajortigisimassanngikkaluarput, Martha Lund Olsen oqarpoq.
 
Meeqqanulli inuusuttunullu 240-sunut pilersaarutit qaqugu piareersimassanersut oqaatigiumanngilaa.
 
- Nalunaarusiaq maanna suliarineqartoq oqaatigisinnaavara, tassanilu atuarneqarsinnaassaaq meeqqat iliuusissat pillugit pilersaarusiorfigineqarsimanngitsut amerlanngitsut.
 
- Nalunaarusiarput qaammat una saqqummertussaavoq, Martha Lund Olsen oqarpoq.