Video: Malik Kleist nutaamik cd-liorpoq

Ukiut tusintilikkaat nikinnerisa nalaanni Chilly Friday nuannarisaapput erinarsuut 'Iggo' kikkunnit tamanit nuannarisaammat. Ukiut arlallit nuannarisaareerlutik nipilersoqatigiit avissaarput maannalu erinarsortuat Malik Kleist nammineq cd-liorpoq arfininngormat saqqummersinneqartumik.

- Erinarsuutit ukiut arlallit ingerlanernanni suliaapput immiussinerillu siulliit 2010-mi pipput, Malik Kleist KNR.gl-mut oqarpoq.

Erinnat qulit immiunneqarput maannalu Atlantic Music aqqutigalugu saqqummersinneqarlutik.

- Tusarnaartitsinissanik pilersaaruteqanngikkaluarpugut. Takoqqaarusupparput cd qanoq nuannarineqartigissanersoq, Malik Kleist oqarpoq.

Nipilersoriaaseq rock cd-mi atorneqarpoq tassanilu peqataavoq Angunnguaq Larsen Chilly Fridayikkunni siornatigut kitaarertartoq. Kitaarertooqataavoq Jes A. Berthelsen tumerparpaartuulluni Hans Rosenberg kiisalu Mik Christensen qatitoortuulluni.

Cd-mi erinnat qulit tamarmik Malik Kleistimit suliaapput.

- Qangali misilikkusuttarsimavara erinnat aallaqqaataaniit naggataa tikillugu nammineq suliarinissaat, Malik Kleist oqarpoq.

Chilly Fridayikkut nalaanni erinnat nipilersoqatigiit tamarmiullutik suliarisarpaat.