VIDEO Kujataamiut umiarsuarmik qulimiguulimmillu angalarusupput

Narsami, Narsarsuarmi, Qaqortumi Nanortalimmilu imaatigut assartuisoqalernissaa naatsorsuutigineqarsinnaavoq. Qaqortulli talittarfiani naapitatta angalariaaseq qanoq ittuussanersoq isumaqatigiinngissutigaat. Tamarmillu tikkuarpaat sikorsuaqartarnera mallertarneralu angallannermut akornusersuutaasartut.
 
- Sikorsuaqarneratami nalaani angalasoqarsinnaasanngilaq. Taamaammat angalanissamut periarfissat marluusariaqarput, innuttaasut ilaat KNR-imut oqarpoq.

- Kujataami sikorsuaqartarpoq, kangerluillu aamma sikusarlutik. Taamaammat illoqarfiit nunaqarfiillu ilaat piffissap ilaani imaatigut tikinneqarsinnaasanngillat.
 
- Aamma imarluttorsuusarpoq, Avaaraq Olsen, IA sinnerlugu kommunalbestyrelsimut ilaasortaq oqarpoq.
 
- Sikorsuaqalernissaata tungaanut imaatigut angalanissarput avaqqussinnaanngilarput, taamaammat qulimiguullit pinngitsoortsinnaanngilagut, taakkulu pigiinnartariaqarpagut, Lars Lundblad, Siumut sinnerlugu kommunalbestyrelsimut ilaasortaq taama oqarpoq.

Sukkasuumik akikinnerusumillu
Qulimiguulinnik angallassinermik tapersersuisut angalanerup sukkanerunera aamma tikkuarpaat.
 
- Qitornaqarpunga illoqarfimmi atuartunik, sikorsuaqarneratalu nalaani mattussaaqqasarpugut. Aamma juullip nalaani meeqqat atuanngiffeqartussanngoraangata imarluttorsuusarpoq, Nanortalimmiu Emilie Madsen oqarpoq.

AAMMA ATUARUK VIDEO Air Greenlandimi sulisup soraarsitaanini quarsaarutigaa

- Aasiannit maanga Qaqortmut ilinniariartorpunga. Umiarsuakkut angalaneq sivisuallaarsoraara. Tikiffissannut apuutilertupallannissara uannut pingaarnerpaavoq, Frida Andersen Larsen oqarpoq.
 
Allat imaatigut angalanerusunnerupput, tamanna akikinnerunera pillugu.