VIDEO: Juulimaaq sannavimini ulapittoq
Juulimaap nissiaqqallu sulliviannut iserluni juullimut poortukkanik poortuisut kisimik takoqqupput. Nuummimi juulimaap nissiaqqat peqatigalugit ilaqutariit isertitakinnerusut juullimut poortugarsinissaat maanna ulapputigileruttorpaat.
- Anaanat kisimiittut, ilinniartut anaanaasut ataataasut qitornallit, angajoqqaallu allat isertitaqarpallaanngitsut ukioq manna ukkatarineruagut. Taakku qitornaminnut juullimut poortukkanik tunissuteqarnissaannik periarfissikkusuppagut. Taama juulimaaq KNR-imut oqarpoq.
Juulimaap pissakitsunut poortugassaanut aningaasaliisunit aningaasat 70-80.000 koruunit missaanniittut, Juulimaap ilanngullugu oqaatigaa.
Meeqqat kisiisa poortugarsinavianngillat. Aningaasaliisummi ima amerlatigaat, juullimut poortukkat sinneqassallutik. Taakkulu angajoqqaanut tunniunneqarumaartut, juulimaaq oqarpoq.
Juullimut poortukkanik tunioraaneq Nuummi Qatserisarfimmi arfininngorpat nalunaaqutaq marluniit tallimap tungaanut piumaarpoq, pisussami assigiinngitsunik aamma susassaqartitsisoqassalluni.
