VIDEO Jørgen Boassen Trumpimik pingaartitsilluni illersuisuusoq unnuami sinippiarsinnaanngitsoq

USA-mi qinersinermi - kina ajugaassanersoq pillugu nunarsuarmit tamarmit malinnaavigineqarpoq.

Nuummilu angutip USA aamma malinnaaffigilluarpaa. Jørgen Boassenip kina illersornerlugu qularutiginngilaa - taannami Donald Trumpimik pingaartitsilluni illersuisuuvoq.

- Ullut kingulliit eqqissiviilliornaqaaq, Jørgen Boassen piffissami matumani unnuami sinippiarsinnaanngitsoq oqarpoq. 

- Qaangiutipallanniarli sinilluartalerniassuugut. Sussaangilaq ullut kingulliit.

AAMMA ATUARUK Biden Georgiami 917-inik taaguunneqarnerulluni siuttuusoq

Biden ullaap-tungaani 264-inik taasisussaqarpoq, Trumpilu 214-inik taasisussaqarluni. Inernerit taakku akunnerit 24-t kingulliit qinersinerit Nevadami, Georgiami, Pennsylvaniami North Carolinemilu kisinneqarneranni taama inerneqarallarput.

Naalagaaffimminilu pingaaruteqartuni naligiiffiukannertartuni naligiingaatsiartoqarpoq, annikitsuinnarmillu nikingasoqarluni. Joe Bidenip naalagaaffiit ilaanni ajugaaguni præsidentinngornissamut pisariaqartunik 270-inik taasisussaqalissasoq, nutaarsiassaqartitsiviup AP-p missiliutaasa takutippaat.

Jørgen Boassenillu sooq Trump illersorpaa?

- Uanga isumaqarama Bidenip tamanna anguniagaqarnermini nunarput tunulliutissagaa. Taamaasillunilu kiniserit russillu nunatsinnut pulajartuaarnissaat qanilliartussalluni.

- Trumpip eqqarsaatiminik oqaatiginnittarnini pitsaaqutigaa.