Vicepolitiinspektøri: Ajunaartoqartillugu suusupaginninnasi
alapernaatsullu kaammattorlugit inoqatiminnik suusupaginninnaveersaaqqullugit.
Sapaatiummat ualikkut Nuummi biilit imminnut apornerisa kingorna, vicepolitiinspektør Bent Heiselbergip puffassimaaqisup oqaasii malillugit ajutoorfinnut saneqquttut pissuserissaartarnissaannik kaammattuinissaq pisariaqarluinnalerpoq.
”Biilit apornermikkut ajoquserujussuarsimasut ingerlaannaq takuneqarsinnaapput, aallaqqaammullu ilaasut aqqunarujussuarsimanissaat annilaanngatigigaluarparput, ilimagisatsinniilli ajunnginnerupput, Bent Heiselberg oqarpoq.
Ajutoorfiusimasunut saneqquttut marserniaannarlutik arriitsuaqqamik saneqquttarnerisigut, ilaasalu allaat unillutik oqarasuaatiminnik angallattakkanik assiliiniarnerat pissutigalugu politiit annaassiniartartullu ajutoorfimmi suliniartut ajoqusersorneqartarnerat pissuserissaarnissaq inoqatinullu misiginneqataasinnaaneq eqqarsaatigalugit akuerineqarsinnaanngilaq. Pissuserli tamanna kanngunartoq pinngitsoorniarlugu inatsiseqanngikkaluartoq imaassinnaanngilaq inuit alapernaannertik aqussinnaanngimmassuk, kiisalu ilaquttat kammalaatillu assilisat takuniassamatigit, politiit annaassiniartullu sulinerat biilinit kinguleriiaartunit kinguarsarneqassasoq, politiimmi annaassiniartartullu alapernaatsunit akornusersorneqarnerat amiilaarnartumik inunnut ikiortarialinnut kinguneqarsinnaavoq.
-Uanga nammineq annaassiniartartut ajutoorfimmukarpaluttut tusarakkit ajutoorfik qanillinaveersaaginnarpara, Bent Heiselberg oqarpoq.
