Viagrat Danmarkimi angutit 13-it maannamut toqqutigaat

Viagra angutinut tissassinnaanermik ajornartorsiuteqartunut iisartagaq Danmarkimi angutinit 13-init ukiut qulit ingerlaneranni toqqutigineqarsimavoq.

Viagra aap naqitsineranik appartitserujussuarsinnaasarpoq kingunerisarpaalu uummaserilerneq.

Danmarkimi anguterpassut Viagramik atuisuupput, ajoraluartumilli toqqutaasartoq, Ekstra Bladet allappoq.

Nakorsaatinik nakkutilliisoqarfiup ukiunut qulinut kingullernut kisitsisinik paasissutissaataani angutit ikinnerpaamik 13-it Viagra-nik atuinermik kingunerisaanik toqquteqarsimapput.

- Aap naqitsinerata apparujussuartarnera pissutaanerpaavoq, taamaaligaangamimi uummat aassaaleqilersarpoq uummaserilernermik kinguneqartumik. Uummaserilernerlu ilaanni tassa toqussutaasarpoq, Lægemiddelstyrelsemi immikkoortortami pisortaq Doris Stenver oqarpoq.

Danmarkimi angutinut 40.005-inut Viagrat 2005-imi agguaanneqarsimapput.

Iisartagaliorfissuup Pfizer-ip taamaalilluni tissassaatit 75,5 mio. kr.-nik nalillit isertitsissutigisimavai.