Venstrep Josef Motzfeldt tapersersorpaa
Puisit atorlugit nioqqutissianik pisiortornissamut inerteqqutaalluinnalersitsisussamik EU parlamentimi ilaasortat arlallit nalunaarummut atsioqataasussarsiorput.
Tamanna akerlilerniarlugu parlamentimi ilaasortat 732-t sapaatip-akunnerata siuliani naalakkersuisunut ilaasortamit Josef Motzfeldtimit allakkamik nassinneqarput.
Allakkami Josef Motzfeldtip maluginiaqquaa, puisit amiinik tuniseqqusiunnaarnerup piniartunut inuutissarsiornermut 1980-ikkunni qanoq ajoqusiisimatiginersoq.
Partiillu Venstrep EU parlamentimi ilaasortaatitai allakkamut qisuariaateqarput, tuniseqqusiunnaarnermullu nalunaarummut atsioqataajumannginnertik nalunaarutigalugu. Venstrep EU parlamentimi ilaasortaatitai sinnerlugit Niels Busk taama allappoq.
Naalakkersuisunut ilaasortap Josef Motzfeldtip partii Venstre sinnerlugu ilaasortat nalunaarutaat nuannaarutigeqaa, lobbyistillu, tassa isumaqatissarsiortut ingasappallaarnerarlugit.
