Nunani avannarlerni partiit avannarliit suleqatigiinnerusoqarnissaa kajumissaarutigaat
Donald Trumpip qinigaanermi kingorna USA'p NATO-mik isumannaallisaanermik qularnaveeqqusiisussaanera arlaleriarluni qularnarsisittarmagu taama kajumissaaripput. Amerikamiut præsidentertaavata nunat NATO-mut ilaasortaasut akiliinerusalernissaat aamma piumasarisimavaa.
Sakkutooqarnikkut pissaaneqarnerpaaq Trumpip qinigaaneratigut inummik naatsorsuussassaanngitsumik, nunallu assigiinngitsut akornanni inatsisinik ataqqinninngittumik qullersartaarsimasoq partiit saamerlerneersut nunani makkunaneersut: Danmark, Finland, Norge, Sverige, Island, Savalimmiut Kalaallit Nunaanneersullu ataatsimut taama nalunaaruteqarput.
Partiit nangillutik allapput:
- Trumpip qiningaaneratigut nunarsuaq inuuffigissallugu nalorninarnerulerpoq, USA-allu NATO-mut ilaanini tunuliaqutsiullugu sakkulersortunut akulerussinnaanera nutaanilluunniit aallartitsisinnaanera annerulerpoq. USA-mi ingerlaatsip Avannaamioqatigiit suleqatiinnerulernissaat pisariaqartinnerulerpaa.
Nunat Avannarliit suleqatigiittariaqarput
Partiit saamerlerneersut Enhedslisten, Alternativet, SF aamma Inuit Ataqatigiit siunnersuutigaat nunat avannarlermiut piareersaqatigiillutik sungiusaqatigiillutillu sakkutooqarnikkut piareersassasut, Naalagaaffiit Peqatigiit akuersinerisigut sakkutuunik eqqissisimatitsisunik ornigutitsisinnaasussanik. Ilanngullugulu nunat taakku nunanut sorsuffiusunut naqisimanniffiusunullu sakkussanik tuniseqqusaajunnaassasut pisussaaffilerneqassasut. Isumaqatigiissutigineqarportaaq Nunat Avannarliit Issittorlu atomimik sakkussianik atuiffiunatillu toqqortaaterfiussanngitsut.
Aviisimut Informationimut illersornissamut ministeri Claus Hjort Frederiksen oqarpoq nunanut allanut- isumannaatsuunermullu danskit politikkianni NATO tassaasoq pinngitsoorneqarsinnaanngitsoq. Aammali nunat avannarliit suleqatigiinnerat Danmarkimut sallersaasoq.
