Venstre: Kalaallit Nunaata arfanniarnissaminut Danamark naatsorsuutigisinnaavaa?

Taamaattorli Socialdemokratit Kalaallit Nunaata puisinniarsinnaatitaaneranut arfanniarsinnaatitaaneranullu pituttugaasimanersut, Kristian Jensenip Venstreneersup paaserusuppaa.

- Assersuutigalugu Dan Jørgensenip kalaallit arfanniartarnerannut puisinniartarnerannullu isornartoqartitsinerujussuanut atatillugu, pitsaanerulersitsinissaq eqqarsaatigalugu Venstrep isumaaniittuarsimasumut,  Socialdemokratit isummaminnik maanna allanngortitsisimanersut paaserusuppara.

Venstret gruppianni siulittaasoq Kristian Jensen oqarpoq.

Taamaammat Socialdemokratit Siumullu suleqatigiinnissamik isumaqatigiissutaata imaarisaa pillugu ministeriunermut Helle Thorning-Schmidtimut paragraf 20 naapertorlugu sisamanik taanna apeqquteqarpoq.
Tassami Folketingimi ammaanermut atatillugu oqallinnermi Doris Jakobsenip oqaluttarfimmit oqaatigisaatut, isumaqatigiissut ilumut kinguneqassanersoq, Kristian Jensenip erseqqissumik paaserusuppaa,

- Kalaallit Nunaata puisinniarsinnaanera arfanniarsinnaaneralu, Socialdemokratinit, Doris Jakobsenimit oqaatigineqartutut, siunissami tapersersorneqarnissaa pillugu isumaqatigiissusiortoqarsimanera ammaanersiorluni oqallinnermi saqqummiunneqarmat tamanna apeqquteqarninnut tunngaviuvoq. Taamatullu isumaqatigiissuteqarsimanermut Helle Thorning-Schmidt isumaqataanersoq paaserusuttorujussuuvara. Nammineq isumaqarnersoq taanna isumaqatigiissut qallunaat  naalakkersuisunngortuinut pituttuisuusoq ilanngullugu paserusuppara, Kristian Jensen oqarpoq, oqaatigalugulu nammineq kalaallit puisinniarsinnaatitaanerat arfanniarsinnaatitaanerallu tapersersorini.
 
Siumup Socialdemokratillu suleqatigiinnissamik isumaqatigiissutaani, Kristian Jensenip atuarsimasaani, puisinniarneq arfanniarnerlu pillugit allassimasoqanngilaq. Isumaqatigiissummi Radioaviisip pissarsiarisimasaani tamanna aamma takussaanngilaq.

Taamaattorli Folketingip imaqarniliaa naapertorlugu, Christiansborgimi oktobarip arfernanni oqallinnermi suleqatigiinnissamut isumaqatigiissut pillugu Doris Jakobsen ima oqarpoq:

- Taassuma imarisaa tassa, Socialdemokratit naalakkersuisunngortullu puisinniartarnerput arfanniartarnerpullu tapersersussagat.

Doris Jakobsenilu nangippoq:

- Suleqatigiinnissamut isumaqatigiissuterput Socialdemokratit atsioreermassuk, pineqartoq pillugu tamakkiisumik tapersersussagaatigut naatsorsuutigaara, issuaaneq naavoq.     
 
Venstre-t gruppianni siulittaasoq isumaqarpoq,  §20 naapertorlugu apeqqutini sukkut arlaatigut paasissutissanik saqqummiiumaartoq:

- Taamaattumik isumaqatigiissusiortoqarsimanngippat imaassinnaavoq Doris Jakobsen salluliuunneqarsimannginnersoq pillugu qulaajaaniarsarisunga. Kalaallit Nunaatali puisinniarsinnaatitaaanerata arfanniarsinnaatitaaneratalu qulakkeerneqarnissaata naqissuserneqarnissaa naalakkersuisunngortunut nutaanut uppernarsartinniarsinnaavara. Kisianni inernerusussaq qanoq ikkaluarpalluunniit akissutigineqartussaaq soqutiginartorujussuussasoq isumaqarpunga, Kristian Jensen oqarpoq.

 § 20 naapertorlugu apeqqutit sisamat, ataasinngormat saquummiunneqartut, akineqarnissaannut ullut suliffiusut arfinillit piffissarititaapput.