Venedig ukiuni 50-ini aatsaat taama ulitsigisoq

Venedigimi nalinginnaanngitsumik marlunngornermi ulippoq, maannalu uligussaaqqalluni.

Venedigimi takornariat aqquserngit uligussaaqqasut akornisigut naloraarlutik ulissimaneranit Markuspladsimut oqquiffissarsiortariaqarput.

Venedigimi borgmesteri, Luigi Brugnaro ajunaarnersuaqarneranik nalunaaruteqarpoq aseruatiterujussuartoqarnissaanillu aarlerisaaraluni, nutaarsiassaqartitsivik Reuters allappoq.

Rekordiliinikuuneq qaangingajanneqartoq

Marlunngornermi unnukkut nalunaaqutaq 22.50 187 centimeterimik ulittoq oqartussat nalunaarutigaat.

Tamanna ukiut 50-it matuma siorna ulerujussuarneranit centimeterialunnit annikinneruinnarpoq. 1966-imi ulerujussuarnerani 194 centimeterimik ulinnikuuvoq.

Ulinneranik uuttuisarnerit 1923-mi aallartinneqarput.

- Pisoq sakkortuvoq, Brugnaro Twitterimi allattoq Reuters allappoq.

- Naalakkersuisut ikiuuteqquagut. Aningaasartuutigineqartussat annertussapput. Tamanna silap pissusiata allanngoriartornerata kinguneraa, Brugnaro oqarpoq.

Sinerissami alapersaarsusisut umiatsiaat ajoqusernernik misissuipput. Pingasunngornerup unnuaani imaq tinikkiartoqqilerpoq.

Assi © : Marco Bertorello/AFP/Ritzau Scanpix

Venedigimi takornariat aqquserngit uligussaaqqasut akornisigut naloraarlutik ulissimaneranit Markuspladsimut oqquiffissarsiortariaqarput. Assi: Marco Bertorello/AFP/Ritzau Scanpix

Markusplads qaqutigoortumik ulittarpoq, taanna 1 meterimik ulippoq.

Aammattaaq Markusip oqaluffianut imermik isaasoqarpoq, ukiut 1200-t ingerlaneranni arfinileriaannaq taamaattoqarpoq.

Qarsutsinerit qaqutigooraluartut qarsutsisoqakkajulertoq

Oqaluffiup oqaluttuarisaanerani qarsutsinernit sisamat ukiuni kingullerni 20-ni pipput. Aserorterinernik maannamut suli nalunaaruteqartoqanngilaq.

Kingullermik oktobarimi 2018-imi qarsutsisoqarpoq. Oqaluffiullu siulittaasuata oqarnera naapertorlugu Markusip oqaluffia ullormi ataatsimi ukiunik 20-nik pisoqalivoq.

Akunnittarfik akimarpalaartut imerniartarfittaa kusanartorsuat uligussaaqqasoq, AFP allappoq.

Assi © : Marco Bertorello/AFP/Ritzau Scanpix

Venedigimi borgmesteri, Luigi Brugnaro ajunaarnersuaqarneranik nalunaaruteqarpoq aseruatiterujussuartoqarnissaanillu aarlerisaaraluni, nutaarsiassaqartitsivik Reuters allappoq. Assi: Marco Bertorello/AFP/Ritzau Scanpix

Ulitsisoqarneranit ataasiinnaq ajunaarpoq.

Angut 78-inik ukiulik, qeqertamit Pellestrinameersoq ajunaarpoq.

Taassuma erngup angerlarsimaffianut angunnerani innaallagissap sarfaarunnerani qupinnguallatsinneqarluni toqusoq, nutaarsiassaqartitsivik ANSA allappoq.