Vejlemi politiit Nuup kommunia ulapputigalugu aallartippaat

Vejlemi Politiit maanna Nuup Kommuneata siunnersuisarfimmik Ramsdal A/S-imik politiinut tunniussinera tunngavigalugu suliaq misissorlugu aallartippaat. Taannalu suliaq Vejlep politeeqarfiani nalunaarsugaareerpoq.

Nuup Kommuneata suliffissarsiuussisarfik aqqutigalugu ilinniartitseqqinnermi pikkorissaanermilu aningaasat Ramsdal A/S-mit aamma kalaallit siunnersuisarfiannit Inulerisut Aps-imit atornerlunneqarsimagunarmata pineqartut politiinut tunniuppaat.

Ilinniartitseqqinnermut pikkorissaanermullu aningaasat atorneqartussat eqqunngitsumik siunnersuisarfinnit taakkunannga Sullissivik Nuuk aqqutigalugu atuisimasutut pasineqarput.

Nuup Kommunea naapertorlugu pikkorissartitsisuusaartoqarsimavoq.

Vejlemi politiit manna suliaq tigusimallugu nalunaarsoreerpaat sulili inuit pineqartut apersorlugit aallartinngilaat, Vejlemi kriminalinspektør Peter Krogh taama oqaluttuarpoq.

Danmarkimi ukiaanerani sulinngiffeqartoqarpoq kriminalinspektørillu aatsaat apersuinerit ullut 14-t qaangiutereerpata pisinnaasut nalunaarutigaa.

- Kalaallit Nunaanni suliaq pingaarutilerujussuusinnaavoq, maanili Vejlemi suliassatsinnit tamanit pingaarnertut isiginngilarput, Peter Krogh ullumi radioaviisimut taama oqarpoq.