Vejlemi kalaallit katerisimaarneranni nakuusertoqarpoq
Vejlemi ippassaq kalaallit katerisimaarnerisa kingunerisaanik, unnuaq politiit sakkortuumik nakuusertoqarnera pissutigalugu biilillu apuinerisa kingunerisaanik marloriarlutik katerisimaartunut orniguttariaqarsimapput. Ritzaus Bureau taama allaaserisaqarpoq.
Inuusuttut marluk katerisimaarnermut peqataasut silamukarsimapput, oqqatilerlutillu. Silamukartup aappaa unatartissimanermit kiinaa ajoqusingaatsiarsimavoq, Odensellu napparsimaviani suliaritittariaqalersimalluni. Politiit unataasoq ullumi parnaarunniarsimagaluarpaat, eqqartuussisulli unataasimaneq katerisimaarnermi matoqqasumi pisimammat unataasoq parnaarutissallugu pisariaqartissimanngilaa.
Unnuap ingerlanerani katerisimaarnermi peqataasut ilaat angerlartilluni tunumininngaanniit biilinik aporneqarpoq, apuisorlu qimaalluni. Angut aporneqartoq Vejlep napparsimavianut unitsinneqarsimavoq, inuunerali navianartorsiunngitsoq nalunaarutigineqarpoq.
Politiit biilit Fredericiami nassaarisimavaat aquttuali suli ujaarineqarpoq.