Vega Sagittarius: Umiarsuarmik kaanngartitsiniaasussat umiarsuarmiipput

Umiarsuarmik assartuummik Vega Sagittariusimik, Nuup avataani ikkarlisimasumik piginnittut, suli oqaatigisinnaanngilaat umiarsuaq qaqugu kaanngartinneqarsinnaanersoq.

- Uuliamik aniasoqanngilaq umiarsuullu motorii tamarmik ajoquteqanngillat. Taamaallat tankini makittarissaatini putusoqarsimavoq. Taanna eqqaassanngikkaanni umiarsuaq annerusumik ajoqusersimanngilaq, umiarsuaatileqatigiiffimmi Vega-Reederei-mi pisortaaneq Arend Brügge KNR-mut oqarpoq.

Vega Sagittarius sisamanngorneq aggustip 16-at ikkartippoq nioqqutissanik avannaanut nassiussanik useqarluni. Sisamanngornermi unnukkut ulinnerani umiarsuaq nusullugu kaanngarteriarneqaraluarpoq iluatsinngitsumilli. Umiarsuaq ima ikkarlissimatigaaq umiarsuit maaniittut kaanngartinnissaa artorsimallugu.

Maanna Vega-Reederei umiarsuarnut ajutoortunut ikiuuttartunik ikiortissarsivoq umiarsuarmik Nuummiit 12 sømilinik avasitsigisumi ikkarlummiit kaanngartitsiniartussanik.

- Taassuminnga suliaqartussat inuit umiarsuarmut ikereerput misissueqqissaarnerillu maanna ingerlappaat. Taakku qarasaasiaq atorlugu pisuusaartitsinerit atorlugit qulakkeerniarsaraat isumannaannerpaamik umiarsuup kaanngartinnissaa. Taakku qulakkeerniarpaat umiarsuup kaanngarteriarneqarnermini sapinngisamik makittarilluarnissaa, Arend Brügge oqarpoq.

Oqaatigisinnaannginnerarpaali umiarsuaq qaqugu kaanngarteriarneqassanersoq.

- Allatulli neriuutigaarput tamanna piaartumik pisinnaassasoq, umiarsuarmik piginnittut KNR-mut ilisimatitsipput.

Suli nalunarpoq umiarsuaq qanoq ilillu ikkarlissimanersoq imartami umiarsuit pajuttut ukiumut 200-nit amerlanerusumik ajornartorsiutaanngitsumik ingerlavigisagaanni.

Ikkarlinneq pillugu eqqartuussivimmi nassuiaasoqartussaavoq. Tamannali aatsaat pisinnaavoq umiarsuup naalagaa ikkarlinnermullu malinnaasut tamarmik Nuummi nunamiilerpata.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat