Vance Kalaallit Nunaannut isumaqatigiissut pillugu: Pigereernikuusatsinnit amerlanerusunik pissarsivugut

USA-p præsidentiata tullersortaa J.D. Vance isumaqarpoq, USA-p Kalaallit Nunaat pillugu isumaqatigiissut immersugassaq nutaaq, Amerikamiut siornatigut pissarsiarisimasaannit, iluaqutiginerungaassagaa.

- Siornatigut p0issarsiareriikkatsinnit annertunerusumik pissarsinerput qularutissaanngilaq, J.D. Vance The Megyn Kelly Show-imi apersorneqarluni oqarpoq.

USA-li sumik pissarsisimanersoq Vancep itinerusumik nassuianngilaa. 

USA-p præsidentiata Donald Trumpip Kalaallit Nunaat Issittorlu pillugit isumaqatigiissummut sinaakkusiutit Natomi allattaaneq Mark Ruttelu isumaqatigiissutigisimallugit, januaarimi nalunaarutigaa. Trumpip qeqertaq piffissami sivitsortumi piumareeraalu tamanna pivoq.

Trumpilli Ruttellu isumaqatigiissutaat pillugu paasissutissat sukumiisut ikitsunnguupput.

Nunanut allanut ministeri Marco Rubio, danskit nunanut allanut ministeriat Lars Løkke Rasmussen (M) aamma Kalaallit Nunaata nunanut allanut ministeria Vivian Motzfeldt, USA-mi januaarip qiteqqunnerani ataatsimeeqateqarnini J.D. Vancep oqaluttuaraa.

- Oqaloqatigiilluaqaagut. Tamannalu nuannerluinnarpoq, ilami Europamiut inuttut inussiarneqigamik naapeqatigiissuteqarnissaminnullu piumassuseqartupilussuullutik, taavali avammut saassuttarpaatigut Amerikamiunillu suleqateqarusunnginnertik oqaatigalugu. Utoqqatseraluarpunga, tamannali ilumuunngilaq, Vance The Megyn Kelly Show-imi oqarpoq.

- Pissutsit aaqqikkumaarnerat tamatta nalunngilarput. Isumaqarpunga taatatut aaqqiineq Europamut pitsaasuusoq pingaarnerpaamillu USA-mut iluaqutaassasoq. USA-mulli nassueruteqarsimanerat naapeqatigiissuteqarsimannginnerallu ilumuunngilaq, Vance nangilluni oqarpoq.

Pissarsissutigissagaat

Trumpip Kalaallit Nunaannut immikkut aallartitaa, Jeff Landry, Danmarkip, nunatta USA-llu akornanni pissutsinut aaqqiissutissatut sinaakkutissat pillugit isumaqatigiissuteqartoqarneranut tunngasumik qanittukkut paasissutissiivoq.

Nunatsinnut tunngatillugu sinaakkutissatut isumaqatigiissut, USA-p Danmarkillu illersornissaq pillugu 1941-mi 1951-imilu isumaqatigiissutaannik tunngaveqartoq, Jeff Landryp Amerikamiut tusagassiorfiannut The New York Times-imut oqaluttuaraa.

Vancep Danmark "Natomi suleqatit pitsaanerpaat ilaattut" apersorneqarnermini taavaa, Danmarkilli isumannaallisaanermut aningaasaliissutai Ruslandimut Kinamullu sanilliullugit annikippallaartut, taanna isumaqarpoq.

Nunatsinnik piginnittuuneq eqqartorpaa aamma Ruslandip Kinalluunniit rakettinik igeriuttakkanik illersuuteqarneq sunnerunikku, USA-p annaassinissaa oqaluttuaralugu.

- Uagut pissarsissutiginavianngilarput. Tamanna naapertuilluanngitsuliorneruvoq. USA-p Kalaallit Nunaat piginngilaa uagullu iluaqutissartaanik pissarsinavianngilagut.

- Taamaattumik malittarisassat allanngulaartigit: USA-p rakettinik igeriuttakkanik illersuuteqarnermut aaqqissuussat nunarsuarmiittut tamarmik illersussappagit, illuatungaani aamma pissarsissutigisariaqarparput, Vance oqarpoq.

/ritzau/