Vajgatip qitigiai nutaanngulerput

Qullissarmiut kingulliit illoqarfik aamarsuarfiusimasoq 1972-mi qimappaat. Inuerunneranit ukiut 40-nngornerat malunnartinniarlugu Vajgatip qitigiai nutaanngorlugit suliarineqarput. Takuteqqaarneqarnera Qullissani pissaaq.

Oqaluttuat Qullissanut tunngasut alianartuinnaanngillat. Illoqarfik taanna inuerunneq qitornaqarpoq inuiaqatigiinnut tunniussaqarluarsimasunik.

Tassaavoq taanna oqariartuut isiginnaartitsinermi ilitsersuisartup Makka Kleistip oqaluttuariniagaa 'Vajgat orkesteret' takutinneqalerpat. Vajgatip qitigiai tunngavigalugit najoqqutassiorpoq erinarsortartorlu Kimmernaq Kjeldsen erinarsortuussaaq Jensinnguup Jens Hendriksenip aamma Jensequtaap Jens Leibhardtip ukiut qulikkaat tallimat matuma siorna suliarisimasaat atorneqalerpata. Erinnat ulloq manna tikillugu inuppassuarnit tusaqqoorneqartartut nutaanngorlugit suliarineqassamaalerput.

- Kristian Søgaardip erinnat nutaanngorlugit aaqqissuuteqqinniarpai. Suliaq ingerlalluassappat eqqarsaataavoq taakku cd-nngorlugit saqqummersinneqarnissaat, Nunatta isiginnaartitsivianiit suli atserneqanngitsumit Svenn Bernhard Syrin KNR-imut oqaluttuarpoq.

Qullissat eqqaaneqaraangata pisimasut alianartut eqqaaneqarajuttarput illoqarfik 1.500-ut 2.000-illu akornanni inoqarsimasoq pinngitsaaliissummik inuerutsinneqarnikuummat.

- 'Vajgat orkesteret' nuannersumik anersaaqarluni suliaavoq oqaluttuami alianartumi eqqugaasimaneq pinnagu. Kisianni Qullissanut nersorinnissutaavoq innuttani nukissamik tunisimammagit ukiorpassuarni inuiaqatigiinnik pitsaasumik kiffartuussisinnaanngortillugit, Svenn Berhardt Syrin oqaluttuarpoq.

Takuteqqaarneqarnera Qullissani pissaaq. Ilimagineqarpoq inuerunneranit ukiut 40-nngortorsiornerat malunnartinneqalerpat inuppassuit ornigukkumaartut. Malunnartitsiniaanermilu tassa 'Vajgat orkesteret' takuteqqaarneqassaaq.

- Makka Kleist najoqqutassiorpoq Vajgatip qitigiai tunngavigalugit suliaasunik. Kimmernaq Kjeldsen erinarsortuussaaq angummik tulleertoqarluni. Taakku nipilersortartunit sisamanit ingiorneqarumaarput, Svenn Bernhard Syrin oqaluttuarpoq.

Takuteqqaarneqarnera pissaaq juulip arfineq aappaanni illoqarfinnilu allani aamma takutinneqarumaarluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat