Uummat ilaasariaqarsoraa
Franskit avatangiisinut ministeriata kalaallillu Peqqinnissamut avatangiisinullu Naalakkersuisuata ataatsimiinnerat nalunaaquttap-akunnerata affarinngilaaluunniit.
Franskit ministeriata tikeraarnera sivikeqisoq, tyskit kansleriata Angela Merkelip, EU-p kommissioniani siulittaasup Manuel Barosop amerikamiullu politikeriisa nuimasut arlaqalersut Ilulissanereersimanerannik pissuteqartoq malunnaqaaq.
- Silap allanngoriartornera Kalaallit Nunaata nammineq takutissorpaa. Tyskit kansleriata Angela Merkel-ip USA-miillu senator Boxer-ip tamatuminnga oqaluttuuppaannga. Angela Merkel-illu oqaluttuuppaanga, eqqarsaannarani timimigut malugisimallugu., minister Borloo oqarpoq.
Peqqinnissamut avatangiisinullu naalakkersuisup Arkalo Abelsen-ip ataatsimiitsiarnerminni saqqummiuppaa, puisit amiinik avammut tuniniaanermi Frankrigip akuersaarnerulernissaa kalaallit kissaatigigaat, soorluttaaq kalaallit arfanniartarnerannut franskit akuersaarnerulissasut kissaatigineqartoq.
- Arkalo Abelsen-ip oqariartuutaa tusarpara, paasillugulu apeqqut inuuniarnermut aamma tunngasuusoq, taakkualu præsident Sarkozy-mut apuukkumaarpakka, franskit avatangiisinut ministeriat Jean-Louis Borloo oqarpoq.
