Uummannarmiut tuaviornerpaamik piareersarput

- Eqqarsarpunga hajja, unnuarumi qalipaasussaagaluarpugut aqaguagumut kusanarniassammat, angumerinavianngilarpulluunniit.

Taama toqqaannartigisumik Hotel Uummannap pisortaa Arne Niemann Radioaviisimit sianerfigitikkami nassuiaavoq.

Dronningi Prinsilu ullunik marlunnit sioqqutsillutik tikipput. Dronningikkullu Hotelimut apuutinnginneraniit akunnerit marlussuit sioqqullugu akunnittarfimmi sulisut aatsaat paasivaat tikilersut. Arne Niemannillu akunnittarfiani unnuisussaasimanngikkaluarput, maannali Uummannamiinnertik tamaat Hotel Uummannami najugaqartussanngorput.

Dronningikkut malittaalu Qaarsunut ullumi tikipput angallammullu ilaallutik Uummanniarlutik, Uummannamut pingasut missaani apuupput.

- Maannalu maaniipput, nuannaaqaallu. Soorunami qasupput ullaaralaarli makinnikuugamik, kaallutillu, Arne Niemann oqarpoq.

Hotel Uummannamilu unnuisussat ilimaginngisat sunik sassaallerfigisarpaat?

- Qaleralik raajalerlugu sualerlugu iffialerlugulu, unnugulu umimmak uilunnik siulequtserlutik, Arne Niemann nassuiaavoq.

Arne Niemann nuannaaqaaq, nassuerutigaali akunnittarfimmi ualimut ulapaartoqarsimaqisoq.

- Akunnerup affaa kingulleq nilliaannaq oqalukkunaraluarpugut, sulisugulli inussiarneqigamik ajunngilaq.

Kommunalbestyrelsemut ilaasortap Isak Hammondip kunngikkormiut Uummannamut tikeraat tikilluaqquai.

- Ulloq eqqissisimaarfiussooq, soorunami tikilluaqquneqassapput, taava tikilluaqqusinerup kingorna Hotel Uummannami najugaqassapput,  sioqqutsisumik tikittussanngornerat pilersaarutinik annerusumik allanngortitsinngilaq, aamma piareerfigisimanngilarput naatsorsuutigineqaraluarmat ullunikkut ulloq Upernavimmi atorneqassasoq, Isak Hammond Radioaviisimut ualeq manna taama nassuiaavoq.

Kunngikkormiut angalanissaminnut pilersaarutaat allanngulaarsimavoq. Aqagu ullaap tungaani Saattuneeriarlutik ualikkut Niaqornaniissapput. Kuupik Kleist Sermitsiaq.ag naapertorlugu taama nassuiaavoq.