Uummannarmiut qaatsiartaateqanngikkallassapput

Ukiortaamiit qaatsiartaammik angallassinissap aallartinnerata kingorna Uummannap kommuniani innuttaasut angallannikkut atugassarititaannik paasitinneqarsimannginnerat pillugu, Uummannap kommuniani borgmesterip Jens Lars Fleischerip Pilersuisumut uparuaataa ullaaq radio aviisimi ilanngupparput.

Ilaatigut Jens Lars Fleischer ima allappoq:

- Illoqarfimmut allamut nunanulluunniit allamut Uummannarmiut angalassagunik maannangaaq inniminniisinnaanngillat, angallassisartut Pilersuisup pilersaarutai pillugit tusagaqarsimanngimmata.

Taamatuttaaq Jens Lars Fleischerip qaatsiartaatip Uummannap kommuniani angerlarsimaffeqassanersoq apeqquteqaatigaa, nunaqarfinnilu talittarfiit pillugit suli suliniuteqartoqarsimannginnera erseqqissaatigalugu.

Jens Lars Fleischerip taama uparuaataa pillugu Pilersuisup pisortaa Gerhardt Petersen ullup ingerlanerani allakkatigut akissuteqaammini ajuusaarpoq Uummannarmiut angallannikkut aaqqissuussineq pillugu suli erseqqissumik ilisimatinneqarsimannginnerannik.

- Qaatsiartaatip piginnaasai killeqarput, qaatsiartaammullu taliffissatut majoraffissatulluunniit kommunip innersuussutigisaa sikup, anorip nunallu sananeqaataa peqqutaallutik atorsinnaasimanngilaq, taliffiusinnaasumillu imaluunniit majoraffiusinnaasumik nassaarniarneq ajornartorsiutaavoq, taama Gerhardt Petersen allappoq.

Taassuma erseqqissaatigaa, tamanna aallaavigalugu Air Greenlandip 2006-imi marsip naanerata tungaanut Uummannami qulimiguulimmik kiffartuussinissaa isumaqatigiissutigineqartoq, tamannalu aallaavigalugu nunaqarfiit ukioq mannatuulli kiffartuunneqarnerat ingerlaannarallassasoq.

Taamatuttaaq erseqqissaatigineqarpoq, qaatsiartaatip atulernissaanut pissutsit tamarmik aaqqereerneqarsimassasut, qaatsiartaatip tamakkiisumik aappaagu apriilip aallaqqaataani atulernissaata tungaanut.

Aammattaaq KNI-p Air Greenland suleqatigalugu bilitsinik inniminniisarneq ingerlatiinnassagaa erseqqissaatigineqarpoq.