Uummannarmiut nioqqutissanik pilersorneqalerput
Uummannami pisisartut nioqqutissanik inuussutissanik nungussimasunik pajunneqarnissamik ujartuinerat matumani tunngavigineqarpoq, umiarsuaararlu nunaqarfiliartaat "Pajuttaat" umiarsuarmit "Mary Arctica"-mit ikiorneqarluni Uummanniassaaq.
Royal Greenland aalisakkanik pallenik 1300-nik Uummannami aamma uninngasuuteqarpoq, toqqorsivinnillu attartortariaqalersimalluni.
"Pajuttaat" usilersoreerluni Aasianniit Uummannaliarnissamut piareeqqavoq, "Mary Arctica"-lu immikkut ittumik Upernavimmeereerpat umiarsuit taakku marluk naapissapput.
Uummannap Sulluani sikup issuallaarnera pissutaalluni Royal Arctic Linep marsip 31-ani Uummannaliarnissani kinguartittariaqarsimavaa, aalisartullu piniartullu sivisunerusumik kangerlummi piniarsinnaanissamik kissaataat taamaalilluni nammassineqarpoq.
Pajuttaalli Mary Arcticamit ikiorneqarluni Uummanniarnissamut periarfissaa maanna atorluarniarneqarpoq, taamaaliortoqanngippat Pajuttaat sapaatip-akunneri sisamat aatsaat qaangiuppata Uummannamukarsinnaassagaluarmat.
Uummannami eqqaanilu aalisartut piniartullu eqqarsaatigalugit Royal Arctic Line Uummannap tungaanut sapinngisamik aalisartunut piniartunullu akornutaanngitsumik umiarsuit aqqutissaannik pilersitsiniarpoq.