Uummannarmiut angalanerusinnaalerput
70 gradernord tassa immakkut angallassisarfik nutaaq massakkut Uummannamut Uummannamiillu ilaasunik angallassisalernissamut piareertoq piginneqataasup ingerlatsisullu John Olsenip oqaatigaa, imalu pilersaaruteqarpalupput:
”Uummannap nunaqarfiinut sapaatip akunneranut ataasiarluta angallammik imaatigut maajiminngaaniit angallassisarnissarput tassa ilaasunik, taava taassuma saniatigut sapaatip akunneranut marloriarluta pingasoriarlutaluunniit ilulissanut Uummannap Ilulissallu akornganni aamma imaatigut ilaasunik angallassisarnissarput”.
Taamatut angallassisarnissaq anguniarlugu angallatit ilaasunik angallassinissamut akuerisaasut marluk tikisilerlugit John Olsenip oqaatigaa.
Angallatillu atorneqartussat arfineq-pingasunik ilaasoqarsinnaasut sillimaniarneq pissutigalugu arfiniliinnarnik ilaasoqartarlutik atortassavaat.
Ilulissanut sinerissamiit tikittartut umiarsuit tulluarsaaffigalugit sapaatip akunneranut marloriarlutik Ilulissanukartarnissartik pilersaarutigalugu John Olsenip oqaatigaa.
Angallasseqatigiiffik pisortanit tapiiffigineqarneq ajortoq namminersortunillu ingerlanneqartoq taamaasilluni pigineqalissaaq.
John Olsenillu oqaatigaa piffissami qaninnermi Air Greenland kiisalu Arctic Umiaq Line saaffigissamaarlugu unammillernerunngitsumik pitsaasumilli suleqatigiissinnaaneq qanoq anguneqarsinnaanersoq paaseqatigiiffiniarlugu.
John Olsenillu oqaatigaa angallasseqatigiiffimmik 70gradernordimik atuineq annertuppat amerlanernik ilaasoqarsinnaasumik angallatitaarnissaq eqqarsaatigineqarsinnaasoq.
Uummannamiit Ilulissanut aqqut ataaseq 1500 kroneqassasoq nunaqarfinnullu 300 koruunit missaaniissasoq 70 gradernordimik piginnittup oqaatigaa.
