Uummannarmiuaqqat aningaasaliiffigineqarput

Dronning Margrethep Prins Henriullu Aningaasaateqarfiata Uummannap Kommuniata meeqqanut kultureqarnermullu ingerlatsivia 25.000 koruuninik aningaasaliiffigaat.

Ilaqutariit klubbianik aallartisaanissamut aningaasat atorneqassapput. Ilaqutariit klubbiat imerajuttut ilaqutaasalu eqimattakkuutaarlutik pisariaqartitaminnik eqqartuiffigisassagaat, Uummannap Kommuniani meeqqanut kultureqarnermullu ingerlatsiviup pisortaa, Kunuunnguaq Fleischer ilisimatitsivoq.

- Ilaqutariit klubbiat, Qaqiffimmi katsorsartittarnerup akisoqisup, tapertaatut isigineqassaaq. Tassani imerajuttut ilaqutaallu ikiorserneqarsinnaassapput, Kunuunnguaq Fleischer oqarpoq.

Imerajuttut ilaqutaasalu klubbimik atorluaanissaat Uummannap kommuniani meeqqanut kultureqarnermullu ingerlatsiviup neriuutigaa. Meeqqat inuusuttullu angerlarsimaffimminni toqqissisimanarnerusumik avatangiiseqarlutik peroriartorsinnaanerat taamaalilluni aqqutissiuunneqarsinnaavoq.