Uummannarmiu 2017-imi Arnatsialattut toqqarneqarpoq

Ane Marie Møller Andersen, Uummannameersoq, 2017-imi Arnatsialattut toqqarneqarpoq. Taassuma inuunermi nuannaarnerup eqqaamanissaata pisariaqarneranik takutitsinini nersorneqaatigaa.

Ane Marie Møller Andersen, ajunaarnersuaqarnerata kingorna ikiuiniartorpassuarnut ilaavoq. Suliniut "Qiillassaqatigiitta" taassuma Uummannami aallartippaa. Illorsuarmit Nuugaatsiamiillu qimagussorneqarsimasut aasaanerani ilaatigut nuannatsinneqarnissaanik aaqqissueqataavoq.

Ane Marie Møller Andersen Uummannarmiuuvoq, naatsorsuuserinermut suliffeqarfimmik tassani ingerlatsilluni, soorlu aamma atisaarniarfik "Tamalaat" pigigaa.Taanna suliffeqarfiutimini sungiusartoqartuarpoq, inuusuttummi ilinniarnissaminnut periarfissaasa qulakkeernissaat pingaartikkamiuk.

Ane Marie Møller Andersen pingasunik meeraqarpoq. Akulliup Kaaleeqqap, anaanami Arnatsialak 2017-imik nersornaaserneqartussatut innersuussimavaa.

Taassuma anaanani inuttut asannilluartutut eqqissisimasutullu oqaatigaa, inoqatiminik ikiuunnissaminut piareersimajuaannartoq.

Ane Marie Møller Andersen innersuunneqartunit katillugit arfineq-pingasunit toqqarneqarpoq.

Arnatsialattut siornatigut toqqarneqartut:

Britta Nielsen, 2004
Amalie Jessen, 2005
Grethe Kramer Berthelsen, 2006
Aviaja Rohmann Pedersen, 2007
Nivi Olsen, 2008
Ella Kleist, 2009
Martha Olsen Adelholm, 2010
Dorthie Friis Lyberth, 2011
Birte Kielsen, 2015
Elise Bruun, 2016