Uummannaq tulaassiffigineqarusuppoq
Aalisagartassiissutit suliffissaqartitsinermik kinguneqartarput, Sigguk A/S-imullu qaleralittassanik aalajangersimasumik malittarisassalerlugu tunniussineq Uummannap kommuneanit nakeriallaatigineqartoq Aasiaat kommunea nuannaaqaaq. Aasianni borgmesteri Enok Sandgreen ima oqarpoq.
- Nuannaajallaatigeqaarput, Aasiannut adresselinnik tulaassassanik pilersitsisoqarmat. Kommunemut aamma annertuumik sunniuteqassaaq, suliffissaaleqinermi annertusimavoq aningaasartuuterpassuaqartitsisimallunilu. Taamatut aalajangertoqarnera, Aasiaat kommuneata aningaasaqarneranut ukiamut pitsanngussassoq naatsorsuutigaarput, Enok Sandgreen oqarpoq.
Uummannap borgmesteria Jens Lars Fleischer isumaqarpoq, Naalakkersuisut taamatut aalajangernerat eqqarsaatigeqqinneqartariaqartoq.
- Ingerlatseqatigiiffimmut namminersortumut taamatut Naalakkersuisut tunniussinerat, aammalu taamatut sakkortutigisumik piumasaqaatitaqarnera eqqarsarnartoqartippara. Soorunami ajunngikkaluarpoq nunamut tulaanneqartussaammata. Aamma naluneqanngilaq ukiuni arlaqalersuni Uummannap kommunea aningaasatigut ilungersunartumik ingerlanikuummat, taamatullu ingerlaannassagutta, ilungersunarnera taamatut ingerlaannartussaalluni. Taamaattumik Naalakkersuisunut eqqarsaatigeqqunaraluarpoq, aamma Uummannap kommuneani una suliniut aallartittuummat, Uummannap Kommunea tulaassuiffigineqarsinnaanissamut eqqarsaatigineqartariaqartoq. Assersuutigalugu qalerallit 3-400 tonsit Sigguk A/S-ip Uummannamut tulaassinnaavai, Jens Lars Fleischer oqarpoq nangillunilu:
- Qaleralittassat komuunimut ataatsimut annaassiniutitut qilersorsimasumik tunniunneqarnerat eqqarsarnartoqarpoq. Sigguk A/S-imut tunngatillugu suliaq, aallaqqaataaniilli Uummannap kommuniata tapersersungaraa, taamaammat Naalakkersuisut noqqaasuinnarnut tunniussinatik aamma suliniuteqartut eqqarsaatigisariaqarpaat, Uummannap borgmesteria Jens Lars Fleischer oqarpoq. Novembarip qaammataa aallarnerfigalugu Uummannami qaleralinnik tulaassuisinnaaneq killeqalertartoq, suliffissaaleqilersitsisartorlu, Jens Lars Fleischer-ip aamma erseqqissaatigaa.
