Uummannaq inuussutissarsiutit pillugit isumasioqatigiiffittaarpoq
Qaasuitsup Kommunia inuussutissarsiutinik siuarsaaneq pillugu ataavartumik avannaata immikkoortuani isumasioqatigiinnernik aaqqissuisaqattaarpoq. Inuussutissarsiutinik inerisaanermik aaqqissuussinerit ingerlanneqarput sumiiffimmi aalisartut peqatigiiffii, tunisassiorfiit, pisortat suliffeqarfiutaat/ingerlataat kiisalu suliffeqarfiit namminersortut soqutiginnittullu suleqatigalugit.
Uummannami ataatsimiinnermi ulluni 9.-10.-11. april 2013peqataasunit anguniakkanik anguniakkatut suliniutaasussanik allattoqarpoq. Taakku ilagaat inuussutissarsiutitigut siunnersuisoqatigiinnik siullertut pilersitsinissaq taannalu ippassaq pilersinneqarpoq. Inuussutissarsiutit pillugit isumasioqatigiiffik pilersinneqarmat Mikael Lange GA Uummannaq, siulittaasutut qinerneqarpoq.
Isumaqatigiissutigineqarpoq qaammatini arfinilinni tullerni tigussaasutut uku anguniarneqarnissaat: Umiatsiaaqqanut iluarsaassisarfik, piniutinik annaasanik saliisitsineq, amutsivik kiisalu mersortarfik.
Qaasuitsup Kommunia piffissami aggersumik inussutissarsiutitigut siuarsaanissaq pillugu sumiffinni ukunani isumasioqatigiisitsisarniarpoq: Aasianni, Qeqertarsuarmi, Upernavimmi, Ilulissani kiisalu Kangaatsiami.
