Uummannaq: angalaniarneq iluarseqqullugu saaffiginnittaraluarpugut

Uummannami angallannikkut pissutsit ilungersunangaarmata inuussutissarsiutitigut ineriartortitsinerup unissimanera ernumagalugu hoteliutillip Arne Niemannip ulloqeqqaanerani Radioaviiseqarnitsinni oqarnera ilisarnartortaqartoq, Uummannap Kommuneani borgmesterip tullia Jens Trolle oqarpoq. Kommunalbestyrelsemit Naalakkersuisunut arlaleriaqalutik saaffiginnissuteqartarsimapput, angallannikkut pissutsit iluarsillaqqullugit.

Jens Trolle oqarpoq, naalakkersuisumut Kim Kielsenimut kingullertigut juunimi saqqummiussisimallutik.

- Ajornartorsiutit nammineerluni takoreerpai, pissutsit piviusut saqqummiuppavut maannamulli annerusumik tusagaqaqqinnata. Jens Trolle oqarpoq.

Uummannap Kommuneata aningaasaqarnermut ataatsimiititaliaata Air Greenlandimeersut aamma oqaloqatigisimavai, Uummannap tungaanut timmisartukkut inissat amerlisinneqarnissaat pillugu.

- Mannali tikillugu amerlanerusunik inissaliisoqarsimanngilaq. Jens Trolle nassuiaavoq.

Pitsanngorsaatissanimmi neriorsuuteqartoqartarnerluni?

- Soorunami ataatsimeeqatigisavut paasinnittarput, maannalu saqqummiussinissaat utaqqiinnarparput. Jens Trolle oqarpoq.

Aamma nassuiaavoq, sinersortaatinit juuniminngaannit novemberi tikillugu tikinneqartarnertik atorunnaarsimammat innuttaasut nunaqavissut angalaniarnikkut mattunneqarsimasut, tamannalu malunnartartoq.

- Ulluinnarni umiarsualivimmi sulisuugama aamma malugisarpara, innuttaasut kujasinnerusumut angalaniaraluit mattunneqarsimasut. Periarfissatuaat tassaavoq, timmisartukkut Ilulissanukariarlutik umiarsuarmut ilaaniuttunut ilanngukkiartorlutik, tamannali aamma ajornartorsiutitaqareerpoq. Jens Trolle oqarpoq.