Uummannaq alianaaqaluni tikilluaqqusivoq
Borgmester Jess Svanep Kommunalbestyrelsemilu ilaasortat Isak Hammondip aamma Karl Kristian Kruse-p seqinnarissuarmi Dronningikkut puttasuni tikilluaqquaat napparsimmavimmullu pisuttuaqatigalugit.
Kommunemi nakorsaaneq pissangaqisoq, Annie Keroudan, Dronning-ikkut napparsimmavimmi angalaarutissallugit piareersimavoq. Angalaarutinnginneranilu radioaviisimut oqarpoq, telemedicin-imut atortuutitik nutaat takutissallugit qilanaaralugit, taakkumigooq ajunngilluinnartumik atormata.
Nakorsaaneq Prinsitulli franskinik siuaasaqarpoq, neriuutigaalu Prinsi franskisut oqaloqatigilaarsinnaassallugu.
Napparsimmavimmut pulaarnerup kingorna tikeraat immikkut assigiinngitsunut pulaarput. Dronningi eqqumiitsulianik saqqummersitsisut alakkarpai, Prinsilu franskimik allamik naapitaqarpoq. Prinsimmi ilisimasassarsiortoq franskeq Jean Maluries pillugu katersugaasivik alakkarteramiuk.
Hotel Uummannami ulloqeqqasiornerup kingorna meeqqat angerlarsimaffiannukarput. Unnugulu Dronningikkut qaaqqusisuussapput Dannebrog-imi, kujammut ingerlaqqinnginnerani, ilassinninnermut aggersaasimagamik.
Uummannami nakorsaq Hans Frederik Heilmann oqarpoq, Kunngikkormiut pulaarneranni napparsimmavimmi atortut takutinneqartut. Ummannami nakorsaq alla franskiuvoq, Annie Keroudan, taassumalu Dronningip uia prins Henrik oqaloqatigaa.
- Franskisut oqaloqatigiippugut. Henriup aperaanga sooq franskiullunga maani Uummannamiinnersunga. Prins Henriup uiga nalunngilaa tassami kunngikkormiunik angalaqataanikuuvoq, angalaneranni qalipaasuulluni. Uima qalipagai oqaloqatigiissutigaagut, pissagangaaramali allanik qanoq oqaloqatigiinnerput puigoriikatappara, kisianni prins Henriup apersorpaanga, Annie Keroudan taama oqarpoq.
