Uummannaq akineqareeraluarpoq

Uummannap kommuniata maanna massuaatigaa Uummannap kommuniani qilalugartassinneqaqqinnissaminnut qinnuteqartaraluarlutik akineqarneq ajornertik.

- Uummannap kommunea arlaleriarluni qilalugartassat ilaneqarnissaannik qinnuteqartaraluarluni akuerineqarsimanersoq akuerineqarsimannginnersorluunniit ullumimut suli akissuteqarfigineqanngilaq, Uummannap borgmesteria Jens Lars Fleischer ullaaq taama issuarneqarpoq.

Uummannap kommunia ukioq manna qilalukkanik 37-nik pisassinneqarpoq, siorna 2005-imi pisassatik 54-inik sipporamikkit . 37-illu pisassarititaasut qaavatigut aamma qilalukkanik qulingiluanik ukioq manna aamma sippueqqippoq.

- Sapaatip-akunnera kingulleq Uummannap kommunia Pisortaqarfimmiit allaffigineqareerpoq naalakkersuisut ataatsimeereerpata isumaqatigiissutaasumik tusarlerneqarumaartut, Piniarnermi pisortaqarfimmi immikkut siunnersorti Ole Heinrich taama oqarpoq.

Pisortaqarfiullu oqarnera malillugu Uummannap kommunea kisimi pisassanik sippuinissamik piumasaqartarpoq kommunit allat sinneri pisassarititaasunik naapertuilluaqqissaartartut.

Aqagu naalakkersuisut ataatsimiissapput.