Uummannap qeqertaasaa qanoq salinneqassava?
Ukiup matuma naannginnerani nunatta naalakkersuisuisa aamma danskit naalakkersuisuisa aalajangiiffigissavaat Avanersuarmi Uummannap qeqertaasaani nuna mingutsinneqarsimasoq qanoq salinneqassanersoq.
Amerikamiut sakkutooqarfigisimasaani saliinissaq naalagaaffiup akilertussaavaa. Taamaattumik qanorluunniit akeqassagaluarpat tamakkiisumik saliisoqarnissaa piumasarissallugu ussernartorsiornarsinnaavoq. Taamaattorli peqatigitillugu illoqarfiit nunaqarfiillu igitassanik qanoq isumaginnittarnissaannut malitassamik aallarniiviusussaavoq. Matumanilu akissaqartissaneripput apeqqutaalerpoq.
Sapaatip akunneri pingasut qaangiuppata Avanersuarmi najugallit Uummannap eqqaa Amerikamiunit ukiuni 50-ini sakkutooqarfioreerluni nunaqarfigineqaleqqissinnaanera pillugu ilisimatinneqassapput.
Novembarip qiteqqunnerani Namminersornerullutik Oqartussat aamma Danmarkimi avatangiisit pillugit Aqutsisoqarfiup siunnersuisoqatigiit Rambøllikkut nalunaarusiaat saqqummiuttussaavaat. Tassani ersersinneqassaaq siunnersuisoqatigiit Uummannatoqqap salinneqarnissaa qanoq takorloorneraat nunagineqaleqqissinnaanissaa sioqqullugu.
Avatangiisit pillugit Pisortaqarfimmi immikkoortumi pisortaq Tina Kreutzmann naapertorlugu periarfissat pingasut takorloorneqarsinnaapput. Siulleq tassaalluni nunap ilaa pineqartoq tamakkerlugu tamakkiisumik saliineq. Periarfissarlu taanna orniginartinneqarnerpaavoq. Tamatuma illuatungaatigut periuseq ilaannakorsiortoq toqqarneqarsinnaavortaaq, tassa eqqaaviit matuuginnarlugit saliineq. Taavalu periaaseq taakkua marluk akornanniittoq aamma toqqarneqarsinnaavoq.
Danskit naalakkersuisuisa siusinnerusukkut oqaatigereerpaat aningaasat avatangiisit pitsanngorsarnissaannut atorneqartariaqartut. Taamaattorli aammattaaq apeqqutaavoq nunatta saliinissammut atatillugu qanoq periuseqarniarnera. Tassami tamakkiisumik akisunerpaamillu piumasaqarnikkut kingunerlutsitsisoqarsinnaammat, Tina Kreutzmann erseqqissaavoq.
Tassami Uummannatoqqap salinneqarnera nunatta sinnerani eqqaaviit salinneqarnissaannut aqqutissiuussisinnaammat.
Uummannatoqaq allatut isigisariaqarpoq, tassami naalagaaffik nunatta avataaneersoq akuutinneqarmat. Taamaattorli naalakkersuinermik suliaqartut uppernassusaat innarlerneqarsinnaavoq, oqartoqassappat naalagaaffik akiliisussaammat avatangiisit saleqqissaarneqarnissaat qulakkeerneqassasoq. Matumanilu apeqqutaalissaaq nunatta karsia kommunillu illoqarfinni nunaqarfinnilu eqqaavinnik tamakkiisumik saliinissamut akissaqassanersut.
Rambøllikkut nalunaarusiaat saqqummiunneqareerpat Qaanaap kommuniani innuttaasunik ataatsimiititsisoqartassaaq. Ataatsimiititsisarnertigut periusissat innuttaasunit ilisimaneqarnissaat kiisalu Avatangiisit pillugit pisortaqarfimmiut innuttaasut oqariartuutaannik pissarsinissaat qulakkeerniarneqarpoq. Tamatuma kingornagut naalakkersuisut Danmarkimilu naalakkersuisut saliinissaq isummerfigissavaat. Aalajangiinissap decembarip aallartilaarnerani pinissaa naatsorsuutigineqarpoq.
