Uummannap Kommunea sulisussaaleqivoq

Atorfillit Uummannamiit soorlu qimarratiinnallartut. Kommune maannakkut kommunaldirektørimik aningaasaqarnermullu pisortamik pissarsiorpoq. Inunnik isumaginninnermut pisortamik aamma inunnik isumaginninnermut siunnersortimik ungasinngitsukkut aamma sulisussarsiortariaqalissapput. Taama nalunaarpoq Uummannami kommunaldirektøriugallartoq, Makkak Marcussen. Makkak Marcussen kommunemi qaammatip aappaa avillugu maanna pisortaagallareerpoq. Kommunaldirektøriugaluartoq Jens-Oluf Lundgreen, siorna septembarimi soraarsitaavoq.

Uummannami borgmesteri, Jens Lars Fleischer, Siumut, kommunalbestyrelsemi illuatungiliuttunit sakkortuumik isornartorsiorneqarpoq.

- Uummannap kommuneata ingerlanneqarneranut akisussaasumik amigaateqarpugut. Pissarsisinnaanngikkutta avataaniit pissarsiortariaqassaagut, Atassummiit kommunalbestyrelsemut ilaasortat, Karl Markussen aamma Elisabeth Fleischer, massuapput.

Borgmesterip taassumalu tullersortaata akisussaaffitsik ingerlassinnaanngippassuk Karl Markussen Elisabeth Fleischerilu iliuuseqarnissaminnut piareersimanerarput. KANUKOKA-mut , kommunep nakkutilliisuinut Uummannamilu kommunalbestyrelsemut allakkani ammasuni tamanna erserpoq.