Uummannami novemberip qaammataani 50-inik qilalugartoqarsimanera Aalisarnermut Piniarnermullu naalakkersuisup, Finn Karlsen-ip, ajuusaarutigaa, Uummannami eqqaanilu pisassarititaasut sinnerlugit pisaqartoqarsimammat.
Sapaammi, kommunip allaffiani pisanik nalunaarsuisarfiup matoqqanerata nalaani pisaqartoqarsimanera, taamaalillunilu nalunaaruteqartoqannginnera utoqqatsissutaanngitsoq, demokraatit inatsisartunut ilaasortaanut Jens B. Frederiksen-imut naalakkersuisoq akissuteqarpoq.
Aalisarnermut piniarnermullu qullersaqarfiup pisassanik sinniisimaneq unioqqutitsinerunerarpaa, ukiormannalu qilalugartassanit taakku ilanngaatigineqassapput.
Uummannap Kommuneata malittarisassat malillugit nakkutilliisimannginnera qullersaqarfiup ajuusaarnarnerarpaa, qinnuigalugillu unioqqutitsillutik qilalugarsimasut politiinut nalunaarutigeqqullugit.