Uummannami qilalugartassat tamakkerneqarput

Uummannap kommuneani ukioq manna qilalukkanik qernertanik 68-inik qaqortanillu arfineq pingasunik pisassiisoqarpoq. Taakku novembarip 20-ianni tamakkerneqareerput. Qilalugarpassuit Uummannap sulluanut maanna pulasimapput, taavanili piniartut isiginnaaginnartariaqartut Niaqornani Aalisartut Piniartullu Peqatigiiffianni siulittaasoq Karl Kristian Kruse oqarpoq.

- Ukioq manna pisasssiissutit novembarip 20-ni nungunneqarput, ullumikkullu ulluni atulikkatsinni qanoq ililluta aningaasarsioriarsinnaanerput naluarput, pisassat nungummata.

Karl Kristian Krusep tikkuarpaa qilalugarniarneq pillugu nalunaarusiortarnerni piniartut tusaaniarneqanngippallaartartut.

- Illuatungeqanngitsumik inatsisiliortarnerup kinguneraa ullumikkut qilalugartassat tamakkerneqaraangata allanik isertitsissutaasinnaasunik takusassaqartannginnerput.

Karl Kristian Kruse oqarpoq ukioq manna qilalugartassiissutaasut nammanngerujussuartut:

- Ilaananngillat. Kommuneqarfitsinni ullumikkut piniartutut allagartaqartuupput 348-it, qilagartassat tamakkerneqareerput miserratigisinnaanngilarpullu pisassat sinnersimallutigit.

Peqassuseq naapertolugu pisassiisimaneq eqqunngilluinnartumik tunngaveqarluni suliaasoq Karl Kristian Kruse oqarpoq.

- Ullumikkut isigisagut qilalugarpassuit sullutsinnut pulasimasut eqqarsaatigalugit naliliisimaneq eqqunngilluinnarpoq. Killilersuinermi piujuartitsinissamilu aalajangersaasarnernut piniartuusugut peqataarusukkaluarpugut, maani taama qilaluaqarluinnaqqissaartigisoq takusinnaagatsigu.

Qilalugartassiissutit ilaqqinneqanngippata tamanna Uummannap sulluani piniartunut kingunerluuteqassaaq.

- Assut nalunarpoq, tamannalumi misigissutsikkut annertuumik innarliissaaq naluneqanngimmat ikummatissaq atortorisallu ullumikkut qanoq akisutigisut. Tassa asuli angalaartanngilagut nammakkiutaaginnartussaammat, ullumikkorpiarlu aallarsinnaanngilagut naak qatsungangaluaqisoq.

Uummannami KNAPP KNAPK-mut tamanna pillugu suliakkiivoq, ulluliillunilu aaqqiisoqanngippat novembarip 25-ninngaanniit piniartukkormiut Landskarsiminngaanniit aningaasalersorneqalissasut.

- Illuatungaanimi aningaasarsiorfissatsinnik allanik tikussisoqarnikuunngilaq taamaattumik iliuuseqartoqanngippat piniartukkormiut Landskarsimiit aningaasaliiffigineqarnissaat piumasaraarput.

Pinngortitaleriffimmi qilalukkanik immikkut ilisimasalik Lars Witting oqarpoq piniartut ingammik qilalukkanut tunngasunut atatillugu oqariartuutaat soorunami tusarusukkitik, oqarlunili Pinngortitaleriffik umiarsuarmik massakkut Uummannamukartsinissamut akissaqanngikkallartoq. Aamma oqarpoq qilalukkanik ilisimatooq Danmarkimiittoq Uummannami massakkut pisut pillugit ilisimatissagini. Pinngortitaleriffik aappaagu marsimi Uummannamut qilalukkanik kisitsiartortitsissaaq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat