Uummannami politiit atuarfimmi aserorterisimasut kikkuusimasinnaanerannik maanna ilimatsaassaqarput.
Maannamut suli tigusarinnittoqanngilaq, kisianni Radioaviisip paasisai naapertorlugit piffissami qanittumi aserorterisimasoq imaluunniit aserorterisimasut politiinit tigusarineqassapput.
Tassami aserorterisimasoq kisimiissimanersoq imaluunniit aserorterisimasut arlaliunersut politiinit oqaatigiumaneqanngikkallarmat.
Ullup ingerlanerani politiit atuarfik misissuiffigaat paasissutissanillu katersillutik taakkualu iluaqutigalugit sakkortuumik aserorterinermut pisuusunik paasiniaaleruttorput.
Atuarfiup initaasa ilaanni igalaarsuit ilaat immiaaqqat puukuinik ujaqqanillu aserorneqarsimapput. Atuarfiup matui qisuusut arlallit kaattamik aamma kaattarneqarsimasut takuneqarsinnaavoq.
Aserorterisut igalaaq aseroriarlugu qarasaasialeriffimmut isersimapput. Assiliivik digitaliusoq, imiisiviillu arlallit tillinniat tillissimavaat.
Atuarfiup aqagu ullaakkut ammaqqinnissaa naatsorsuutigineqarpoq.
