Uummannami meeqqanut inuusuttunullu angerlarsimaffik sinnilinnik inissiisariaqartartoq

Meeqqanut inuusuttunullu ulloq unnuarlu angerlarsimaffik Uummannamiittoq 27-inik maanna tigummiaqarpoq, naak angerlarsimaffik 23-inut taamaallaat inissaqaraluartoq. Inissat sipporlugit inissiisoqartariaqartarpoq, tassanngaannartumik inissiisariaqarlertoqartillugu, taama oqarpoq Uummannami meeqqanut inuusuttunullu angerlarsimaffimmi ningiu Ann Andreasen:

Tassa maanna sisamanik inissaqartissinnaasagut sinneqqavagut. Inissat sipporlugit ineqartitsinissaq anguniagarinngikkaluarparput, kisianniuna kommunini pinartoqavitsillugu ilaanni tigusisariaqartartugut, Ann Andreasen oqarpoq.

Erseqqissaatigaalu sulisoqarnikkut perorsaanikkullu isumannaatsumik sullissisinnaasutut nalileraangamikku, aatsaat kommunit ikioqqusut angertaritik.

Børnehjemmi ingerlalluarmat kommunit meerartaminnut atorumasarpaat, taamaattumik ima saffiginnissutini tunngavilersorpaa.

Nalunnginnakku Uummannami børnehjemmi meeqqat tigusassanik qaangerlugit ukiut tamaviisa tigusisartoq, taavalu isumaqarsimagaluarpunga aamma Familidirektoratiminngaanniit soorunalimi aningaasanik ikiorneqartartoq. Meeqqat taakku qaavisigut tigusatik inuussutissaqartinniarlugit, kisianni taamaassimannginnami, taamaammat taanna assorujussuaq tupigalugu. Marloqiusatullu eqqarsartutut isigalugit apeqquteqaatigigiga.

Astrid Fleischer Rexip taamaattumik neriuutigaa Naalakkersuisut akissuteqaatiminni erseqqissumik paasitikkumaaraanni pissutsit qanoq innersut qanorlu iliuuseqarfigissamaarneraat.

Uummannami meeqqanut angerlarsimaffik meeqqanut inuusuttunullu 17-inut innarluutilinnullu arfinilinnut inissaqartitsivoq. Maannakkorpiarlu sisamanik sinneqarput. Angerlarsimaffimmi ningiu aperaarput aningaasassaaleqisarnersut.

Soorunami aningaasaliissutit sipporlugit atuinaveersaartarpugut, kisianni aningaasaliissutaasartut pillugu maleruaqqusanut tunngatillugu ilaqutariinnermut pisortaqarfik attavigisariaqarparsi. Nalunnginneruaat, Ann Andreassen oqarpoq.

Ilaqutariissutsimut pisortaqarfimmi ulloq unnuarlu angerlarsimaffimmut tunngasuni immikkoortortami pisortaq Gitte Jul oqarpoq, Astrid Fleischer Rexip Naalakkersuisunut apeqquteqaataata akineqarnissaa utaqqimaariarlugu oqaaseqarsinnaajumaarluni. Naatsorsuutigineqarpoq naalakkersuit sapaatip-akunneri marluk qaangiutsinnagit akissuteqarumaartut.