Uummannami inuussutissarsiorneq ammuinnaq ingerlanerarpaa
Naalakkersuisut angallannikkut siornali aaqqissuusseqqimmata Uummannami inuussutissarsiorneq takornariaqarnerlu ammuinnaq ingerlasimapput.
Uummannap hotelia takornariaqanngilaq, naak ukiup taamaalinera takornariaqarnerpaaffiusarlunilu angallaffiunerpaasaraluartoq. Timmisartorluni uummanniarneq akisummat takornarianit aamma ornigineqanngilaq.
Ukiorpassuarni hoteliutillip Arne Niemannip Uummannami inuussutissarsiutinik inerisaasoqannginnera ernumagaa, imalu oqarpoq:
- Naalakkersuisut siulittaasuata Hans Enoksenip inatsisartut ataatsimiinnerat ammarlugu neriorsuuteqarsimavoq, Uummannamut umiarsuakkut angallanneq ukioq manna iluarsiivigineqassasoq. Mannali tikillugu suli iluarsiisoqanngilaq. Arne Niemann oqarpoq.
Taamaattumik Uummannami inuussutissarsiutillit aalisartullu ataatsimoorlutik borgmester Jens Lars Fleischerimut aamma Naalakkersuisut siulittaasuannut Hans Enoksenimut angallanneq pillugu allagaqaateqarsimapput.
Pingaarnersiuinermi Uummannap kingulliunneqartarnissaa sulissutigineqartuartoq Arne Niemannip qularutiginngilaa.
- Uummannamit Qaarsuarsunnut qulimiguulimmik timmisartuussisarnerup akikillisinneqarnissaa Attaveqaqatigiinnermut Naalakkersuisup Kim Kielsenip sulissutigisimavaa, tamannalu qujanaraluaqisoq aaqqiissut annikitsuinnaavoq. Arne Niemann naliliivoq.
Aamma nassuiaavoq, Uummannamut timmisartuussisarnerit amerlisinneqarsimanngitsut, pissutsit erloqinarnerulernerannik kinguneqartumik.
- Uummanniartarnerit ikippallaarnerisa kingunerisaannik nunami inuussutissarsiortut aalisartullu atortunik taartissamaatinik tikitsiniartarnerat ajornakusuulerpoq, sapaatip-akunneri sisamat-tallimat utaqqisoqartarmat. Uannullu hoteliutilittut ima kinguneqarpoq, hoteli aasaq naallugu inoqarsimanngimmat. Arne Niemann oqarpoq.
Umiarsuit takornarianik angallassisut Uummannamut sapaatip-akunneranut pingasoriarlutik tikittarput, taakkuli aningaasatigut iluanaarutigineqarujussuarsinnaanngitsut taavai.
Takornariat Uummanniarumannginnerannut angallannerup akisunerujussuanngorsimaneranik peqquteqartoq Arne Niemann isumaqarpoq.
- Qaarsuarsunni mittarfeqalernissaa innuttaasunit aallaqqaataanilli akerlerineqarsimavoq, aammami taakunnarnissaq pillugu timmisartortoqarneq ajormat. Taamaattorli neriorsuutigineqarsimavoq, suluusalinnut mittarfeqalerpat timmisartukkut akit 35-45 %-imik appassasut, tamannalu pisimanngilaq akitsorujussuaannarsimallunilu. Arne Niemann tunngavilersuivoq.
Aamma eqqaavaa, umiarsuarsuarnut takornarianik angallassissutinut ilaasut tupigisarsimagaat, Uummannap tikinniarnera taama ajornartigisoq.
- Takornarianik angallassisut taama amerliartortiginerannut nunatsinni angallassinerup aaqqissuussaanerata ajorluinnartiginerannut ersiutaaginnarpoq. Arne Niemann erseqqissaavoq.
