Uummannami illoqarfimmi eqqagassat nungutinneqarnissaat ajornartorsiutaavoq. (Toqqorsivimmit assi).Assi: Malik Brøns / KNR

Uummannami eqqakkat amerliartortut: Kommunip ESANI-mit ikiorneqarnissaa politikerip kaammattuutigaa

Avannaata Kommuniani eqqagassalerinermi ajornartorsiuteqaleqqippoq. Jens Kristian Therkelsenip (S) Uummannami eqqakkat ikuallatsikkusuppai.

Tipi niviukkallu.

Eqqakkat amerliartuinnartut akornutaasullu ajornartorsiutaasut Uummannami takuneqarsinnaallutillu naamaneqarsinnaapput.

Tamanna Siumumit Inatsisartunut ilaasortap, Jens Kristian Therkelsenip maluginiarpaa.

- Uummannami eqqagassat isumagineqannginnerat pissutigalugu niviugarpassuit inunnut ajornartorsiutaapput, taanna Naalakkersuisunut allappoq.

Taassuma nunalerinermut, imminut pilersornermut, nukissiuutinut avatangiisinullu Naalakkersuisoq, Kalistat Lund (IA) ajornartorsiutaasumut iliuuseqarnissaa kissaatigaa.

Imaaliallaannarneqarsinnaanngilarli. Innuttaasummi suliffeqarfiillu eqqagassaannik isumaginninneq kommunip nammineq akisussaaffigaa.

ESANI A/S

 

  • Nunatsinni kommunit tallimat ataatsimoorlutik eqqagassalerinermik ingerlatseqatigiiffik 2019-ip upernaavani pilersippaat, kisianni Avannaata Kommunia qaammatit qulingajaat qaangiuttut ilaasortaajunnaarpoq.
  • Ingerlatseqatigiiffiup Nuummi Sisimiunilu ikuallaaviit nutaat marluk ingerlanneqarnerat isumagissavaa.
  • Tamanna Nunatsinni eqqagassalerinermik pitsaanerulersitsissaaq avatangiisinullu mingutsitsinnginnerulluni.
  • 400 millionit koruuninik akeqassaaq.
  • Sisimiuni ikuallaavissap nutaap 2022-mi piareernissaa Nuummiittussallu 2023-mi piareernissaa naatsorsuutigineqarpoq.
  • Ilulissani, Aasianni, Nuummi, Sisimiuni Qaqortumilu ullumikkut ikuallaaveqarpoq

Kommunilli eqqagassat ikuallanneqartussat ammaannartumi piffissami aalajangersimasumi ikuallanneqarsinnaanissaannut immikkut ittumik akuersissummik qinnuteqarsinnaavoq. Tamannalu Avannaata Kommuniata Namminersorlutik Oqartussanut qinnutigereerpaa. Ikuallaanerli ikuallaavinni akuerineqarsimasuni pisussaavoq.

- Avannaata Kommunianit qinnuteqaat Naalakkersuisunit suliarineqarpoq aammalu kommuni oqaloqatigineqarluni, naalakkersuisoq, Kalistat Lund akissuteqarpoq.

Eqqagassat nungutinnissaat akisusoq

Avannaata Kommuniata eqqagassanik ajornartorsiutaangaatsiartunik piffissat ilaanni immikkut akuersissuteqarfiunngitsumik ikuallaasinnaanissaa Kalistat Lundip itigartitsissutigaa.

Eqqakkanillu ammaannartumi ikuallaaneq piffissaq ungasinnerusoq eqqarsaatigalugu aaqqiissutissaanngitsoq, taassuma erseqqissaatigaa. Tassungali taarsiullugu kommunip eqqakkat suliarineqarnissaanut aaqqiissutissarsivinnissaq pisussaaffigaa.

Aaqqiissullu taanna ingerlatseqatigiiffittut, ESANI A/S-itulli ittuussaaq. Taanna nunarput tamakkerlugu kommunini eqqagassalereqatigiiffittut 2019-imi pilersinneqarpoq.

Avannaata Kommuniatali ingerlatseqatigiiffimmut aningaasartuutit annertuallaarmata qaammatit qulingiluat qaangiuttut peqataaffigiunnaarpaa.

AAMMA ATUARUK Avannaani eqqaaveqarneq iluarsineqassappat ima akeqassaaq

Eqqagassalli nammineq isumaginiarnerat aamma akisuvoq. Tamanna kommunip aningaasartuutini takoreeraalu borgmesterip, Palle Jerimiassenip siorna paasivaa.

- Kommunimit naatsorsornikuuarput eqqakkanut ilitsivissat, nunaqarfinni aqquserngit iluarsartuunneqarnissaat kiisalu poortuinernut tunngasut ingerlatissagutsigit aningaasat 135 millioni koruunit atortariaqartussaassallutigit. Taannalu kommunip aningaasartuutigisussaassavaa, Palle Jerimiassen KNR-imut 2021-mi aggustimi oqarpoq.

Tamatuma kingorna Avannaata Kommuniani politikerit ESANI A/S-imut ilannguteqqinnissartik isumaliutigilerpaat. Taamaaliortoqassappalli ingerlatseqatigiiffimmut 2024 naatinnagu 10 millionit koruuninik akiliisoqassaaq, tamatumalu kingorna ukiumut 3,3 millionit koruunit ilaatigut eqqagassat Nuummi Sisimiunilu ikuallaavinnut assartornissaannut atorneqartassallutik.

Kommuninut eqqagassalerilluni angalassasoq

Kalistat Lundillu kommunip ESANI aqqutigalugu ikiorneqarnissaa kaammattuutigaa.

Ingerlatseqatigiiffimmi Namminersorlutik oqartussat Avatangiisinut aningaasaateqarfianut ”eqqagassalerilluni angalanissanut” aningaasaliiffigineqarnissamut qinnuteqarnikuuvoq, taamaalilluni kommunit tamarmik aasap ingerlanerani eqqagassanik poortorneqarsimasunik aallerfigineqarsinnaassallutik. Kommunilli eqqagassat poortorneqarnissaat aaneqarnissamullu piareersarnissaat namminneq akilissavaat.

AAMMA ATUARUK Avannaata Kommunia eqqagassat pillugit isummaminik allanngortitseqqilersaartoq

Kalistat Lundillu Avannaata Kommuniata tamanna atorluassagaa kaammattuutigaa.

- Aamma Avannaata Kommuniata periarfissaq taanna atussagaa neriuutigaara, naalakkersuisoq allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl