Uummannami børnehjemmi sinnilimmik meeraateqarpoq
Meeqqanut ulloq unnuarlu angerlarsimaffik Uummannamiittoq inissaqartitanit sisamanik amerlanerusunik tigummiaqarpoq.
Aningaasatigulli ajornartorsiuteqartoq, Demokraatit sinnerlugit inatsisartuni ilaasortaq Astrid Fleischer Rex oqarpoq. Naalakkersuisunut apeqquteqarnermini ulloq unnuarlu angerlarsimaffiup Namminersornerullutik Oqartussanit aningaasanik tapiiffigineqartarnera amigarsoraa.
- Inissanut naammaannartumik aningaasanik tapiisoqartarpoq inissallu sinnerlugit aningaasaliinissaq eqqarsaatigineqarsimanngitsoq , Astrid Fleischer Rex isumaqarpoq.
Naalakkersuisunut apeqqutigaa, taama aaqqissuussineq naammaginartutut isigineraat aamma meeqqat angerlarsimaffianni tiguneqartut tamarmik akiliuttalernissaat eqqarsaatigineraat. Tamaasa akiliuttassanngikkunikkit taava qanoq ilioqqinniarnersut aamma aperaaq.
Uummannami børnehjemmi tusaamasaalluarpoq taamaattumillu kommunit amerlasuut meeqqat tassunga allatsikkusuttaraat, Demokraatit oqarput. Tamannalu peqqutigerpiarlugu inissat sinnerlugit ineqartuutigineqartut unnerpai.
-Aningaasaliissutilli amigarput, Astrid Fleischer Rex allappoq.
Uummannami meeqqanut angerlarsimaffik meeqqanut inuusuttunullu 17-inut innarluutilinnullu arfinilinnut inissaqartitsivoq. Maannakkorpiarlu sisamanik sinneqarput.
