Uummannami borgmesteriugallartussaq ippassaq aallartippoq

maajip 05-at 2006 06:18

Uummannap kommuneani politikkikkut allaffissornermilu pisortaqannginnerup inernerigallarpaa, borgmesterip tullersortaata aappaata Siumumeersup, Karl Tobiassenip, borgmesterinngorallarnera.

Tamanna ippassaq sisamanngornermi pivoq.

Aqutsisoqannginnertik Atassutip kommunalbestyrelsemi ilaasortaasa marluk KANOKOKA-mut allakkatigut ippassigami nalunaarutigaat. Uummannap kommunea maannakkorpiaq kommunaldirektøreqanngilaq, aningaasaqarnermut aqutsisoqarani, isumaginninnermilu qullersaqarani, sulisussarsiorlunili allagarseereerpoq.

Uummannap borgmesteria Siumumeersoq Jens Lars Fleischer, Inatsisartuni aamma ilaasortaasoq, Inatsisartuni februaarimili ataatsimeeqataasarpoq.

Borgmesterimut tullersorti, Jens Trolle, Jens Lars Fleischerip peqanngissatilluni borgmesteriugallassasoq nalunaarfigisussaavaa. Jens Trolleli nammineq peqanngissaguni borgmesterip tulliata aappaanut nammineq nalunaartussaavoq. Tamannali aallaqqaammut pisimanngilaq, Atassutilli apeqquteqaateqarneratigut Karl Tobiassen Qaarsunit aggersarneqarpoq, Uummannami borgmesterip allaffiani ippassamiit atuutilersumik issiagallassalluni.