Uummannami angalaniarnerup pitaannginnera ilinniartitsisussaaleqisoqarneranut pissutaqaataavoq
Nunarput tamakkerlugu atuarfeqarfiit qaammatini makkunani ilinniartitsisunik amigaatigeqisaminnik atorfinitsitiniarlutik aviisini internettikkullu allagartaliillutik atorfinitsitassaminnik ujaasileruttorput.
Illoqarfippassuarnili ilinniartitsisunik atorfinitsitsiniartarneq ajornaatsuinnaaneq ajorpoq.
Uummannami nunaqarfiinilu ukioq atuarfiusoq kingulleq ilinniartitsisoqarniarneq ukiunut siuliinut naleqqiullugu ajorseriarsimavoq, ilinniartitsisut aallartut taarserniarneri ajornakusoorsimammat. Uummannami Edvard Krusip atuarfiani pisortaasoq Naja Rosing Fleischer oqarpoq avinngarusimasuni angalaniarneq aammalu inuuniarnerup akitsoriartuinnarnera atorfinitsitiniarnerup ajornakusoornerulerneranut peqqutaaqataasoq:
- Assigiimmik akeqartitsinerup atuutsinneqalernera peqqutaaqataasoraa, taavalu angallanniarnikkut aamma sapaatip akunneranut marloriaannarluni Uummannap tikinneqartalersimanera aammalumi angalaniarnerup akisoorujussuunera peqqutaaqataasoraakka, Naja Rosing Fleicher oqarpoq.
Naja Rosing Fleicher oqarpoq atorfinitsitiniarnerminni intenetti allagartaliiffigalugu atortaritsik; kiisalu KNR- skiltereklamitigut neqerooruteqartarnerarlutik.
Naja Rosing Fleischer aamma oqarpoq ukiuni aalajangersimasuni atorfinitsitisarneq, ukiut tamaasa akiliunneqarluni angalasinnaanermik aammalu soraarnermi ajunngitsorsiasaqartitsinermik imaqartoq ilinniartitsisunik atorfinitsitiniarnerminni siorna juunimili Uummannami atorneqalersimasoq, tamannalu iluaqutaasimagunarpoq; tassami aasaru ilinniartitsisunngortussaq Dorthe Zeeb naammassiguni Uummannap kommuniani Qaarsunut ilinniartitsisunngoriartorniarluni aalajangersimavoq:
-Nammineq taavanngaanerpunga, nunaqarfimmilu sulinissara soqutiginartilllugulu pissanganarnerutippara nunaqarfinni innuneq illoqarfinni inuunermiit allaaneroqimmat; Dorthe Zeeb oqarpoq.
Dorthe Zeeb aamma oqarpoq atuarfimmi sulineruni Ilinniarfissuarmi ilinniarsimasani Atuarfitsialammut tulluarsakkat meeqanut atuartitsinermini tunniussinnaallugu.
Taama oqarpoq ilinniartitsisunngorniaq Dorhe Zeeb.
Ukiuni aalajangersimasuni atorfinitsitisarneq ukiut tamaasa akiliunneqarluni angalasinnaanermik aammalu soraarnermi ajunngitsorsiasaqartitsinermik imaqartoq nunaqarfinni tamani illoqarfinnilu avinngarusimanerusuniittuni atorneqartarpoq.