Uummammik unittoortut siunissami periarfissagissaarnerulissapput

Pikkorissaaneq Nuummi nakorsaqatigiinnit aaqqissuunneqarpoq, taakkulu 2012-imi aasakkulli piareersaallutik pilersaarusiorlutillu aallartissimapput. Pikkorissaasussat tassaapput nakorsat pilertortumik suliaqartartut, nakorsat ilisimajunnaarsitsisartut uummatillu nakorsaat Danmarkimi siuttuusut qulingiluat, uummammik unittoortunik pilertortumillu nakorsartariaqartunik ulluinnarni sullissisartuusut.

ALS pikkorissaanerup nunarsuarmi tamarmi akuerisaasoq, peqataasunullu piumasaqaatit pikkorisaanerullu imarisaanut sukannersunik malittarisassaqartinneqarpoqi. Ulluni marlunni sukumiilluinnartumik pikkorissaasoqassaaq. Pikkorissaanermi atuagarsortoqarlunilu inuusanik sungiusartoqassaaq, inuusallu taakku uummatip tillernerinik assigiinngitsunik takutitsisarput aammalu uummammik unittoortuusaartitsineq sapinngisamik piviusorpalaartinniarlugu qupinnguallatsinneqarsinnaallutik. Peqataasut tamarmik pikkorissaanermi atortussanik sukumiisunik atuagassinneqarsimapput pikkorissaanermilu angusissagunik takutitsillutik allattariarsorlutillu soraarummeertinneqartussaallutik.

-Taamatut pikkorissaasoqarnera Nunatsinnut pingaaruteqartupilussuuvoq. Nakorsat peqqissaasullu sammisaqarfimmi pingaaruteqarluinnartumi piginnaasamikkut sungiusaqqissinnaapput pitsanngorsaallutillu aammalu pilertortumik katsorsartarialinnik uummammillu unittoortunik katsorsaanissaminnut pikkorinnerlulerlutik. Peqataasut uummarsaanermi periaatsinik sungiusarneqassapput pilertortumillu annaassiniarnermi eqqortumik iliorsinnaanissartik sungiusassallugu. Pikkorissaaneq Nunatsinni napparsimasunut, nakorsanut peqqissaasunullu tamanut iluaqutaassaaq, Nuummi pikkorissaanermik aqutsisoqatigiit ningiuat, nakorsaq Line Damsgaard oqarpoq.