Uumasut nakorsaat: Inuussutissalerinermik Nakkutilliisoqarfik tigusinnaavarput

Allattoq Mads Lynge
aggustip 08-at 2006 05:56

Naalagaaffiup Inuussutissalerinermi Nakkutilliisoqarfia nunatta ajornaquteqanngitsumik Danmarkimiit tigusinnaavaa, aningaasat apeqqutaaginnarput, taama oqarpoq Inussutissarsiornermi Pisortaqarfimmi uumasut nakorsaat, Lasse Holm.

- Inuussutissanik assigiinngitsunik, soorlu aalisakkanik, Kalaallit Nunaaniit EU-mut tunisassiortoqassappat, pinngitsoornata mallittarisassat EU-mi atuuttut malittussaavavut. Tassani apeqqutaanngillat kikkut naalakkersuinikkut oqartussaasuunersut, danskit imaluunniit kalaallit, Lasse Holm oqarpoq.

Taamaattumik nakkutilliineq Namminersornerullutik Oqartussanut nuunneqassappat, inatsisilerituunik atorfinitsitsinerup saniatigut, Namminersornerullutik Oqartussani nakkutilliivimmik pilersitsinermut atatillugu aamma angalallutik suliffeqarfinnik nakkutilliisussanik aamma atorfinitsitsisoqartariaqarpoq.

Tamakkuuppullu Inuussutissarsiornermi Suliffissuaqarnermilu Naalakkersuisup, Siverth K. Heilmannip isumaa naapertorlugu, 15-20 millioni koruunit missaannik naleqartussat.