Uumasut nakorsassaaleqineq qimminut tuppoq: Naalakkersuisup telemedicin aaqqiissutiginiarpaa
Nunatsinni uumasut nakorsaat amigaataapput, tamannalu avannaani qimminut qimuttunut eqquivoq.
Qimuttumik qimmeqaruit, savaateqaruit, hesteqaruit timmiaateqaruilluunniit nuna tamakkerlugu uumasunut nakorsiarfissaq ataasiinnaasoq taamaallaat Nuummiippoq.
Avannaata kommuniani siusinnerusukkut uumasunut nakorsaqaraluarpoq atorfilli taanna ukioq ataaseq sinnerlugu maanna inuttaanngilaq, Ilulissani najugalik IA tunuliaqutaralugu Avannaata kommuniani kommunalbestyrelsemi ilaasortaasoq Niels Davidsen oqarpoq.
Uumasummi nakorsaanik amigaateqarneq inuttut nammineerluni malugaa:
- Ippassaani qimmikka 19-iugaluarput, ullumikkulli 18-iinnanngorput, qimmerami ataaseq napparsimalluni ippassaq toquvoq, taanna oqaluttuarpoq.
Assiliisoq: Niels Davidsen.
Uumasut nakorsaqannginnera Nielsimut qimmiutilinnullumi allanut ernumatitsivoq, qimmitimmi nakorsarneqarsinnaasanngillat.
Qimmeq qimuttoq nakuaq
Kalaallit qimmiat nakuarsuuvoq pinertooq, kaassinnaasoq aammalu nunamut issittumut naleqqussagaasoq.
Taamaattumik Niels Davidsenimut qimminillu qimuttunik qimmiutilinnut allanut pingaarluinnarpoq uumasut nakorsaanik atorfinitsitsisoqarnissaa, qimmip napparsimalernerani aperineqarsinnaasumik siunnersuisinnaasumillu.
- Soorunami qimmigut paarilluartarpagut. Napparsimaleraangatali nakorsiussinnaasanngilagut, nakorteqqinnissaalli neriuutigiinnartariaqartarpagut, nakorteqqinngikkaangatalu toqusut isigiinnartariaqartarpagut, Niels Davidsen oqarpoq.
Qimmini nakorsamik takuneqarsimagaluarpat annaanneqarsimassagaluarnersoq soorunami naluaa, uumasummi nakorsaanik aperisassaqanngilaq.
Siornatigut Ilulissani uumasut nakorsaqarallarmat aperisinnaasaraluarpoq, ullumikkullumi aamma taamaaliorusukkaluarpoq.
- Kissaatiginaraluarpoq Avannaata Kommuniani uumasut nakorsaannik sisamanik kommunitsinni atorfinitsitsisoqarnissaa, tassa Ilulissani, Uummannami, Upernavimmi Qaanaamilu.
Massakkorpiarli pissutsit taamaatsillugit kissaataannaaginnarpasippoq.
AAMMA ATUARUK Qimuttunik qimmillit peqatigiiffii: Qimmit nakorsassaaleqimmata toquinnartarpagut
Qarasaasiat aqqutigalugit aaqqiissuteqarneq
Avannaata Kommuniani kommunalbestyrelsemi ilaasortatut Niels Davidsen tamanna isiginngitsuusaaginnarsinnaanngilaa, Akisussaaffilli Namminersorlutik Oqartussaniippoq.
Aalisarnermut Piniarnermullu Naalakkersuisup Karl Tobiassenip Siumut qimminik qimuttunik qimmiutillit kipiluttunartoornerat paasilluarsinnaavaa.
Namminersorlutimmi oqartussat arlaleriarluni uumasut nakorsaanik atorfinittussamik nivinngaasaraluarpoq, tassa avannaani aammalu kujataani atorfinitsitassaminnik, qinnuteqartoqarnerli ajortoq Karl Tobiassen oqarpoq.
Allatulli ajornartumik Nuummi najugallit uumasut nakorsaat atorfissaqartitsisoqartillugu sinerissamut nassiunneqartariaqartarput, soorlu avannaanut qimuttunik qimmeqarfiusunut.
Akisoqaarli, taamaattumillu naalakkersuisoq tassunga akisussaasuusoq qarasaasiakkut nakorsiartitsinissamik misileraatitsivoq.
- Sumiiffiit qimmeqarfiusut isorartupput taamaattumik telemedicini atorlugu nakorsiartitsinerit pisariaqarput, massakkorpiaq Qaanaaq Sisimiullu misilerarpagut, tassa oqarasuaatikkut telemedicin atorlugu nakorsiartitsinerit pisarput, siunissamilu periutsip taassuma ingerlatiinnarnissaa pisariaqarallassasoraara, Karl Tobiassen oqarpoq.
AAMMA ATUARUK Ilulissani uumasunut nakorsaarusuttoqanngitsoq
Maannami Avannaata kommuniani qimmilerisut qimminik akiuussusersuinerit ingerlattarpaat.
- Qimmit allanik nappaatinik napparsimalersillugit telemedicin atorlugu nakorsiartitsinerit pisariaqarput taannaavorlu maanna misileraatigisarput, Karl Tobiassen oqarpoq.
Niels Davidsen isumaqarpoq, uumasut nakorsassarsiornermut akisussaaffik Namminersorlutik Oqartussat iluatsissinnaanngippagu nammineq kommuneminni tamanna akisussaaffigilersinnaagaluaritsik.
- Maani kommunalbestyrelsemi ilaasortaavunga ukiup ataatsip matuma siornatigut kommunetsinni siunnersuutiginikuugaluarpara, uumasut nakorsaanik pissarsiortarneq Namminersorlutik Oqartussat iluatsissinnaanngippassuk uagut akisussaaffigisinnaagaluaripput. Avannaatami kommunia Namminersorlutik Oqartussanik tamanna pillugu suleqateqarnissaminut piareersimavoq taamalu ajornartorsiummik aaqqiinissaminik, taanna oqarpoq.
Naatsorsueqqissaartarfiup kisitsisaatai naapertorlugit 2021-m qimmit qimuttut katillugit 13.395-iupput, taakkulu Ilulissaniipput, Uummannami, Upernavimmi. Qaanaamilu 2021-mi qimmit qimuttut 8.600-nik amerlassuseqarlutik.
