Uumasut naasullu siusinaartalerput

Danmarkimi avatangiisit pillugit misissuisoqarfimmi Danmarks Miljøundersøgelsemi professori Mads Forchammer saqqummiussisuuvoq.

- Allanngornerit angisuut takuagut. Upernaakkut kiattupilussuusalerpoq, pinngortitamullu tamanna sunniuppoq. Ukioq 1996-mi misissuilluta aallartinnitsinnit maannamut piffissaq, naasut inerikkiartorfissaat uumasullu naasortorfissaat, 30 procentinik sivitsorsimavoq, issittumilu pissutsit eqqarsaatigissagaanni tamanna annertuvoq, Mads Forchammer oqarpoq.

Silap pissusaata allanngorneratigut uumasut naasullu naleqqussarluarsimanerat nutaarsiassaavoq nuannersoq.

- Taamaanneralu uumasunut naasunullu kinguneqarpoq. Ukiup siulianiit tullianut malugisinnaasarpaat, assersuutigalugu terianniat sisiminniit siusinnerusukkut aninissartik, naasut siusinnerusukkut sikkerarnissartik timmissallu siusinnerusukkut manniliornisartik malugisarpaat. Tassalu Zackenbergimi pinngortitaq naleqqussallaqqissuuvoq. Tassalu piffimmi silap pissusaata allanngornera manna tikillugu malinnaafigisimavarput, nangippoq.

Tunumi kiannerulernera umimmaat Zackerbergip eqqaaniittut aamma iluaqutigivaat. Ukiut qulit ingerlaneranni umimmaat marloriaammik amerlipput.

- Aasaq puallarserfissaat sivisunerulersimavoq. Piffissaq, umimmaat neriffissaat, ullunik qulinik ilasimappat, arnavissat piaraat marlunnik ilasinnaalissapput, Mads Forchammer oqarpoq.
Silap pissusaata allanngorneratigut issittumi pinngortitaq naleqqussarsimagaluartoq, silap pissusaata allanngornerata pisortanit isiginiarneqarnissaa pingaaruteqartorujussuuvoq, Mads Forchammer oqarpoq.

- Uani paasisassaq tassaavoq, silap pissusaata allangornerata sunniutai ilanngunneqarpata piareersimasoqarnerussasoq, uumasut naasullu nalinginnaasumik allanngorneri kisimik isiginiarneqarniarneranngarnit, tamannalu qitiulluinnarpoq. Uumasut amerlassussiisa ineriartornerat silap pissusaata allanngorneranut pingaaruteqarput, Mads Forchammer oqarpoq.

Nunarpulli silap pissusaata allanngorneranut piareersimasoq, Mads Forchmmer isumaqarpoq.

- Pinngortitaleriffmi silap pissussaa pillugu ilisimatusarfimmik pilersitsoqareerpoq. Kalaallillu oqartussaat taamaalillutik silap pissusaa pillugu annertunerusumik ilisimasaqalissapput, taamaalillunilu aamma assersuutigalugu tuttuttassat amerlassusissaannik piareersartoqarsinnaavoq, Mads Forchammer oqarpoq.

Silap pissusaa pillugu Københavnimi ataatsimeersuartoqarneranit suleqaterput Martine Lind Krebs malinnaavoq.