Uumasut ikinngutaat kajumissaarivoq
Namminersorlutik Oqartussani uumasut nakorsaanik pingasunik sulisoqarpoq taakkualu ilaat pisaqarfinni sulisarnissaat Uumasut ikinngutaasa siulittaasuata kissaatiginartippaa.
Uumasut nakorsaannik ataavartumik sulilersussamik aaqqiissoqarnissaa utaqqivarput, Susanne Markdahl peqatigiiffimmi Uumasut Ikinngutaanni siulittaasoq oqarpoq, erseeqissaatigalugulu uumasut nakorsaat atorfimminnut ivertinneqaramik pisussaaffilerneqaramik, uumasunik ajornartorsiortunik ikiuunnissaminnut pisussaaffilerneqaramik, Susanne Markdal oqarpoq.
Uumasut nakorsaata namminersortup suliunnaarnera ilutigalugu uumasunik angalaannartunik tigooraasoq toqoraasartorlu aamma suliunnaarpoq.
Kommuneqarfik Sermersooq uumasunik angalaannartunik tigooraasartumik toqoraasartumillu namminersortumik isumaqatigiissutaa atorunnaarnikuuvoq.
Uumasut ajoqusersimasut naalliuinnarnissaat Susanna Markdalip ernumanartippaa. Uumasut ajoqusersimasut passunneqarsinnaanngillat, aamma uumasut ajoqusersimallutik ikiorneqarsinnaanngitsut toqunneqarnissaannut politiit sulisussaqanngillat.
Politiinit ikiorneqarnissamik pisariaqartitsiffiusumi politiit allanik suliassanik pingaarnerusunik suliassaqartaramik uumasut pillugit suliat pingaarnerutinneq ajorpaat, Susanne Markdal oqarpoq.
Uumasut soorlu aqqusinermi angallaffiusumi ajoqusersimasunut orniguttarsinnaallutik politikommisær Janus Eigaard neriorsuivoq.
Uumasut napparsimasut imaluunnit ajoqusersimasut toqunneqarnissaannut politiit pisussaanngitsut Janus Eigaard ersseqqissaavoq.
Uumasut ajoqusersimasut imaluunniit napparsimallutik ikiorneqarsinnaanngitsut toqunneqarnissaat, Namminersorlutik Oqartussat kommuunillu suliassaraat akisussaaffigalugulu, Janus Eigaard oqarpoq.
Kommuneqarfik Sermersuumi uumasut nakorsaannik atorfinititsinissap tungaanut aaqqiissutissat pillugit kommuneqarfik Sermersooq oqaaseqartinniarsimagaluarparput, tamannali ilutsissinnaasimanngilaq.
Nuummi uuumasut nakorsaat namminersortoq Pia Cordt Olsen sulinerminut atatillugu uippakajaarneq pissutigalugu sisamanngormat suliunnaarpoq, mannalu tikillugu Nuummi uumasut nakorsaannik namminersortumik sulisoqannngialq.
