Uumasut eqqissillutik nuliarsarsinnaasariaqarput
Nannut eqqissillutik nuliarsarsinnaasariaqarput aamma qilalukkat eqqissillutik immami uumasuusariaqarput, uumasut taakku filmiliarineqaratillu aallakaatitassiatut TV-liarineqartariaqanngillat, taamatut oqartoq tassaavoq tusagassiuutit pillugit ilisimatooq Brett Mills.
Allattoq Jaaku Lyberth
maajip 06-at 2010 08:58
Tuluit tv-kkut aallakaatitassiaat piviusulersaarut "Nunarsuaq uumasulik"
KNR TV-iatigut aallakaatinneqartartoq aallaavigalugu Brett Millsip uumasut inuttut pisinnaatitaaffeqarnerat oqaluuserisassanngortippaa, aviisi Berlingske Tidende taamatut allaaserisaqarpoq.
- Uumasut nuliartut, piaqqisut aammalu toqusut pinngortitaq pillugu aallakaatitani takutinneqaqqattaarput. Inuit taamatut pinerat pillugu TV-kkut taamatut akulikitsigisumik aallakaatitsisoqarneq ajorpoq, Brett Mills oqarpoq.
Taamatut ajornartorsiutinngortinniarneqarnera ilisimatuumit Peter Sandøemit Københavnip universitetianeersumit ilumuunnginnerarneqarpoq.
- Uummasut TV-kkut aallakaatitassiarineqarnertik soqutiginngilluinarpaat, Peter Sandøe oqarpoq.
