Katuami isumattorsaqatigiissitsinermut aaqqissuisoq Kira Lennert Olsen assimi takuneqarsinnaavoq.Assi: KNR

Uumasut assigiinngisitaarnerat pillugu inuusuttut isummatik tusartikkaat

Uumassusillit assigiinngissitaarnerat pillugu inuusuttunut isumattorsaaqatigiisitsineq nunatsinni siullerpaamik Katuami marlunngormat unnukkut ingerlanneqarpoq. Isumaallu FN-imut apuuneqassapput.

Inuusuttut 30-t missaanniittut 15-it 30-llu akornanni ukiullit isumattorsaqatigiinnermut peqataapput, politikerinillu oqalliseqateqarlutik.

Inatsisartunit partiit tallimat ataatsimik tamarmik peqataatitaqarput.

Uumassusillit assigiinngitsorpassuit, soorlu uumasut, naasut, pupiit, bakteriat uumassuseqartullu tamarmik uumasut assigiinngisitaarnerannik oqaluuserinninnermi pineqarput. Nunatsinni uumasut assigiinngisitaarneranni pineqartut Issittup ilaanut najugaqarfitsinnut naleqqussarsimasut assersuutigalugu aalisartappagut, piniartappagut nuniattarlutigillu.

Kira Lennert Olsen inuusuttut marluk allat peqatigalugit aaqqissuisuuvoq.

- Kalaallit Nunaanniit inuusuttut immikkut ittunik isummersinnaanissaat aaqqissuussinitsinni siunertaraarput. Isumattorsaqatigiinnermit isummersuutit FN-imut tunniunneqarnissaat siunertaavoq. FN-immi siuttui uumasut assigiinngisitaarnerat pillugu nunarsuaq tamakkerlugu ukiunut tulliinut qulinut anguniagassanik Kinami ukiup tulliani isumaqatigiissuteqartussaavoq, Kira Lennert Olsen oqarpoq.

Naratsit orpippassuillu

Kira Lennert Olsen Islandimi aaqqissuussamut matumannga assigusumut nunarput sinnerlugu peqataavoq. Tassanili naratsit orpippassuillu eqqartorneqarput.

Nunatsinnilu uumasusseqartut pillugit isummat FN-imut apuunniarlugit nunatsinni aaqqissueqataavoq.

- Nunatsinnit isummagut ilanngunneqartariaqarput. Taamaammat aaqqissuussivugut FN-ip isummersuutit nunatsinneersut tusartariaqarmagit, Kira Lennert Olsen oqarpoq.

Taama aaqqissuussaqarneq inuusuttunik amerlanerusunik uumasut assigiinngissitaarnerannut soqutiginninnerulersitsissasoq Kira Lennert Olsenip neriuutigaa.

Taamatuttaarlu politikerinut sunniuteqarluarumaartoq neriuuteqarluni.

- Aaqqissuussaq tigulluarneqarumaartoq neriuppunga. Politikerit aningaasarsiornermik ineriartortitsinissaq pinngortitap illersornissaaniit pingaartinnerusarnerat annilaanganarsinnaammat, taakkulu marluk nalimmassarneqarnerusariaqartut isumaqarpugut. Taamammat politikerit aggersarnikuuagut isumassioqatigerusullugit, Kira Lennert Olsen oqarpoq.

Uumasut assigiinngissitaarnerat tassaaginnanngilaq uumasut, kisiannili uumassusillit suulluunniit qulequttamut tassunga aamma ilaapput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat